एनएसएलको सम्झौता रद्ध गर्ने निर्णय

काठमाडौँ – फ्रेन्चाईज फुटबल नेपाल सुपर लिग (एनएसएल) का लागि अखिल नेपाल फुटबल संघ (एन्फा) र आयोजक नेपाल स्पोर्टस एण्ड इभेन्ट म्यानेजमेन्टबीच भएको सम्झौता रद्ध हुने भएको छ । 

शुक्रबार एन्फा तथा एनएसएललाई लिएर असन्तुष्ट बनेका चार ‘ए’ डिभिजन क्लबका पदाधिकारीबीच भएको बैठकका क्रममा एनएसएलका लागि भएका सम्झौता रद्ध गर्ने निर्णय भएको हो । 

---

सम्झौतापत्रको धेरै बुँदामा धेरै त्रृटिहरु भएका कारण सम्झौतापत्र रद्ध गर्ने निर्णय भएको बैठकमा सहभागी भएका थ्रीस्टार क्लबका महासचिव सञ्जिब सिल्पकारले बताए ।  

बैठकमा विभिन्न बुँदाहरु, जस्तै सम्झौतापत्रको पहिलो बुँदामा सातवटा प्रदेशको सातवटा टिम रहने, अर्को बुँदामा एएफसी र फिफासँगको आवद्धताको बारेमा उल्लेख भएका विषयमा छलफल भएको सिल्पकारले बताए । 

‘सम्झौतापत्रमा कुनै मिति नलेखिएको तथा सम्झौतापत्र चार वर्षका लागि बनाइएको छ । त्यसैले सम्झौता नै रद्ध गर्ने निर्णय भएको हो,’ उनले थपे । 

बैठकमा एन्फाको तर्फबाट वरिष्ठ उपाध्यक्ष विर बहादुर खड्का, महासचिव किरण राई, उपाध्यक्ष  तथा महिला सदस्यको उपस्थिति रहेको थियो भने थ्रीस्टार, मनाङ मर्स्याङ्दी क्लब, संकटा क्लब र न्युरोड टिमका प्रतिनिधिहरुको उपस्थिति थियो । 

यसअघि भने जेठ ३० गते भने एन्फाका पूर्व महासचिव इन्द्रमान तुलाधरको हस्ताक्षर रहेको पत्रमा एनएसएल भदौ २५ देखि कात्तिक ५ गतेसम्म एनएसएल आयोजनाका लागि आयोजकलाई समय दिएको थियो ।

तर एन्फामा नयाँ नेतृत्व आएपछि सम्झौता रद्ध गर्ने सहमति बनेको छ ।