भविष्यबारे छलफल गर्न रोनाल्डो इंग्ल्यान्डमा

काठमाडौँ – पोर्चुगिज फुटबल स्टार क्रिस्टियानो रोनाल्डोले इंग्लिस क्लब म्यानचेस्टर युनाइटेडमा उनको भविष्यबारे छलफल गर्न मंगलबार म्यानचेस्टर आइपुगेका छन् । रोनाल्डोले युनाइटेडका मुख्य प्रशिक्षक एरिक टेन हागसँग क्लबमा बस्ने वा नबस्नेबारे छलफल गर्ने स्काइस्पोर्टसले जनाएको छ ।

प्रशिक्षकसँग कुरा गर्नुअघि ३७ वर्षीय स्ट्राइकर रोनाल्डो आफ्ना एजेन्टसँगै अभ्यास स्थल आएका थिए । युनाइटेडका पूर्व मुख्य प्रशिक्षक सर एलेक्स फर्गुसन पनि अभ्यास स्थल पुगेका थिए ।

---

पारिवारिक कारण युनाइटेडको प्रि-सिजन टूरअन्तर्गतको थाइल्यान्ड र अष्ट्रेलियाको भ्रमणमा नगएका रोनाल्डो युके आइपुगेका हुन् ।

मुख्य प्रशिक्षक टेन हागले भने रोनाल्डो क्लबको अभ्यासमा रहने बताएका थिए । क्लबले भने रोनाल्डो बिक्रीमा नरहेको जनाएपनि प्रस्तावका बारेमा छलफल गर्न तयार रहेको बताइन्छ ।

रोनाल्डो र युनाइटेडबीच एक वर्षको सम्झौता अझै बाँकी रहेको छ ।