महिला साफः पाकिस्तानमाथि बंगलादेशको शानदार जित

काठमाडौँ- नेपालमा जारी साफ महिला च्याम्पियनसीप फुटबल अन्तर्गत बंगलादेशले लगातार दोस्रो खेलमा जित हात पारेको छ । त्रिपुरेश्वरस्थित दशरथ रंगशालामा शनिबार भएको समूह ‘ए’ को खेलमा बंगलादेशले पाकिस्तानमाथि ६-० गोल अन्तरको जित हात पारेको हो ।

प्रतियोगितामा बंगलादेशको यो लगातार दोस्रो जित हो । यस अघि पहिलो खेलमा बंगलादेशले माल्दिभ्सलाई ३-० गोल अन्तरले पराजित गरेको थियो ।

---

पाकिस्तानको भने यो लगातार दोस्रो पराजय हो । यसअघि पाकिस्तानले भारतसँग २-० ले पराजित भएको थियो । यससँगै पाकिस्तान प्रतियोगिताबाट बाहिरिएको छ ।

शनिबारको खेलमा बंगलादेशलाई जित दिलाउन कप्तान सविना खातुनले ह्याट्रिक पुरा गरिन् । रितु पोर्ना, मोनिका चक्मा र मोसामात सोप्नाले एक-एक गोल गरे ।