ए डिभिजन लिगः मनाङ शीर्ष स्थानमा उक्लियो

काठमाडौँ- मनाङ मर्स्याङ्दी क्लब सहिद स्मारक ‘ए’ डिभिजन फुटबल लिगको शीर्ष स्थानमा उक्लिएको छ । शुक्रबार च्यासल मैदानमा भएको खेलमा मनाङले फ्रेन्ड्स क्लबलाई २-० गोलले पराजित गर्दै शीर्ष स्थानमा उक्लिएको हो ।

मनाङलाई जित दिलाउन टिमोथी कोउडोले दुबै गोल गरे । उनले ३३ औँ तथा ५१ औँ मिनेटमा एक-एक गोल गरे । जितसँगै मनाङले ६ खेलबाट १४ अंक जोडेको छ । फ्रेन्ड्स भने ४ अंकसहित १२ औँ स्थानमा छ ।

---

यता एन्फा कम्पलेक्समा भएको खेलमा एफसी खुमलटारले जावलाखेल युथ क्लबलाई २-२ को बराबरीमा रोकेको छ । बराबरीसँगै जावलाखेलले पनि १४ अंक जोडेपनि गोलअन्तरका आधारमा दोस्रो स्थानमा झरेको छ । खुमलटार भने सात अंकसहित नवौं स्थानमा उक्लिएको छ ।

आजको खेलमा जावलाखेलका लागि नकोटो मासोअबी र फोडे फोपानले एक-एक गोल गरे । खुमलटारका लागि अविशेक लिम्बु र मेसुके ओलोमोउले एक-एक गोल फर्काए ।

नकोटो मासोअबीले ३३ औँ मिनेटमा जावलाखेललाई अग्रता दिलाएपनि खुमलटारका अविशेक लिम्बुले ३५ औँ मिनेटमा बराबरी गोल गरे । मेसुकेले ६३ औँ मिनेटमा गोल गर्दै खुमलटारलाई २-१ दिलाए । तर फोफानले ८६ औँ मिनेटमा गोल गरेपछि जावलाखेलले १ अंक जोड्यो ।