चर्च ब्वाइजले यसरी जित्यो लगातार तीनवटै डिभिजन लिगको उपाधि

काठमाडौँ– यही वर्ष ‘बी’बाट उक्लिएको चर्च ब्वाइज युनाइटेड क्लबले सायदै सोचेको थियो– ‘ए’ डिभिजन लिगको उपाधि उचाल्छौं । तर, भइदियो यस्तै ।

चर्च ब्वाइज राजधानीमा जारी सहिद स्मारक ए डिभिजन लिगको एक खेल खेल्नुअगावै च्याम्पियन बनिसकेको छ । उसो त उपाधि जित्ने तयारीका साथ स्टार खेलाडीहरू, अनुभवी प्रशिक्षकको क्लबले कमी हुन दिएको थिएन । त्यसैको उपलब्धि हो उपाधि ।

---

हरेक खेलमा प्रशिक्षक बालगोपाल महर्जनको रणनीति अनि खेलाडीहरूको मेहनत नै उपाधिका लागि हकदार बन्यो । उसो त लिगको सातौं खेलसम्मका प्रशिक्षक प्रदीप हुमागाईंको योगदानलाई पनि कम आँक्न मिल्दैन । उनी रहँदा चर्च ब्वाइज अपराजित थियो ।

जारी लिगमा उत्कृष्ट खेल पस्केका खेलाडीमध्ये अन्जन विष्ट र आशिष चौधरीले समान ७/७ गोल गरेर क्लबलाई यहाँसम्म ल्याएका छन् ।

ए डिभिजनको डेब्युमै उपाधि जितेर एउटा इतिहासलाई फेरि सम्झाइदिएको छ चर्च ब्वाइजले । त्यो इतिहास मनाङ मर्स्याङ्दीको नाममा छ । उसले पनि ए डिभिजनको डेब्युमै उपाधि भित्र्याएको थियो २०४३ मा । त्यही कीर्तिमानलाई चर्च ब्वाइजले जारी लिगमा जादुमयी खेल देखाउँदै भेटेको छ ।

चर्च ब्वाइजले पनि मनाङको जस्तै इतिहास रचेको छ । मनाङले २०४२ मा 'बी' डिभिजन खेल्यो अनि उपाधि जित्यो । २०४१ मा सी डिभिजन खेल्यो अनि उपाधि जित्यो । ठीक उसैगरी लगातार तीनै वटा डिभिजनको उपाधि जित्ने अर्काे क्लब बनेको छ चर्च ब्वाइज ।

चर्च ब्वाइजले अघिल्लो संस्करणको ‘बी’ डिभिजन लिग खेलेको थियो । त्यसको उपाधि उचाल्दै यो वर्ष चर्च ब्वाइजले ‘ए’ डिभिजनमा डेब्यु गरेको हो । ‘सी’ डिभिजन जित्दै चर्च ब्वाइजले ‘बी’ मा डेब्यु गरेको थियो ।

चर्च ब्वाइज ललितपुरस्थित बालकुमारीको क्लब हो । २०६६ सालमा अगाडि राष्ट्रिय खेलकुद परिषदमा फुटबल क्लबको सामाजिक क्लबमा दर्ता भएको थियो । स्थापनासँगै चर्च ब्वाइजले स्थानीय टुर्नामेन्टहरूमा भाग लिन थाल्यो ।

स्थानीय स्तरमा बिस्तारै पकड जमाउँदै गरेको यो क्लबले ‘सी’ डिभिजनका लागि छनोट खेल्यो । चौथोपटकसम्म छनोट हुन सकेन । तर, हार मानेन । क्वालिफायरमा निकै संघर्ष गरेपछि पाँचौँपटक मात्रै ‘सी’ डिभिजनमा छनोट हुन सकेको थियो ।

सुरुआती चरणमा संघर्ष गरेको चर्च ब्वाइजले ‘सी’ डिभिजनमा छनोट भएपछि भने पछाडि फर्कन परेको छैन । त्यो बेलादेखि क्लबले निकै सफलता पाइरहेको छ ।

लगातार पाँच पटकको प्रयासमा मात्र क्वालिफायरबाट सी’ डिभिजन लिगमा उक्लेको थियो । सी डिभिजन लिग क्वालिफायरमा कूल ३८ क्लबहरू सहभागी थिए । धेरै क्लब भएपछि ग्रुप बनाइएको थियो । ग्रुप विजेता छनोट हुने प्रावधान अनुसार चर्च ब्वाइज ग्रुप ‘इ’ बाट छनोट भई सेमिफाइनलको यात्रा तय गरेको थियो ।

चर्च ब्वाइज ‘सी’ डिभिजन क्वालिफायर सन् २०१९ मा भएको हो । ग्रुप ‘एफ’ को सेतीओपी च्याम्पियन ब्वाइज क्लबलाई सेमिफाइनलमा ५–१ गोल अन्तरले जित्दै चर्च ब्वाइज फाइनल पुगेको थियो ।

२०१९ जुनमा भएको फाइनलमा सुन्धारा युवा क्लबलाई ५–० गोल अन्तरले जित्दै चर्च ब्वाइज ‘सी’ डिभिजन लिगमा उक्लेको थियो । वीरगन्ज युनाइटेड, झापा एफसी र चर्च ब्वाइज युनाइटेड ‘सी’ डिभिजन लिगमा सँगै उक्लेका हुन् ।

सन् २०२० मा हुनुपर्ने ‘सी’ डिभिजन लिग कोभिड–१९ ले गर्दा हुन सकेन । सन् २०२१ को सहिद स्मारक ‘सी’ डिभिजन लिगको समूह चरण खेलहरूमा आफ्नो समूहमा शीर्ष स्थान हासिल गर्दै चर्च ब्वाइजले सुपर सिक्सको यात्रा तय गरेको थियो ।

लिगको सुपर सिक्स खेल सकिँदा शीर्ष स्थानमा रहेर चर्च ब्वाइज युनाइटेड च्याम्पियन बनेको थियो । चर्चले उपाधि जित्ने क्रममा १० अंक जोडेको थियो । झापा फुटबल क्लबलाई २–१ गोल अन्तरले पराजित गर्दै चर्च ब्वाइजले उपाधि जितेको हो । ‘सी’ डिभिजन लिग च्याम्पियन बनेको चर्च ब्वाइज युनाइटेडले उपाधिसहित १० लाख हात पार्यो ।

त्यस्तै वीरगञ्ज युनाइटेड क्लब र सामाजिक युवा क्लब पनि दोस्रो र तेस्रो स्थान हासिल गर्दै ‘बी‘ डिभिजनमा बढुवा भएका थिए। चर्च ब्वाइज र वीरगञ्ज ‘सी’ मा बढुवा भएको एकै वर्षमा ’बी’ डिभिजनमा उक्लिएको हो । 

चर्च ब्वाइजका सनम राई उत्कृष्ट डिफेन्डर र चर्च ब्वाइजकै सलमान लिम्बु उत्कृष्ट मिडफिल्डर घोषित भएका थिए । व्यक्तिगत विधातर्फ उत्कृष्ट हुने दुवै व्यक्तिगत २५–२५ हजार हात पारेका थिए ।

‘बी’ डिभिजन लिग २ मार्च २०२२ मा सुरु भएको थियो र २० अप्रिल २०२२ मा सकिएको थियो ।

उक्त लिगको च्याम्पियन बन्दै चर्च ब्वाइज युनाइटेड ‘ए’ डिभिजन लिगमा उक्लेको थियो । चर्च ब्वाइज युनाइटेडले बी’ डिभिजन लिग पनि एक खेलअगावै जितेको हो । उसले बाँसबारी क्लबलाई ५–१ गोल अन्तरले पराजित गर्दै लिगको उपाधि जित्यो अनि सन् २०२२/२०२३ सिजनको सहिद स्मारक ‘ए’ डिभिजन लिगका लागि बढुवा भयो ।

लिगको १३ खेलमा ९ जित निकाल्दै ‘ए’ डिभिजनमा डेब्यु गर्न पायो । उसले सो लिगमा २ हार र २ बराबर खेल्दै २९ अंक जोडेको थियो । लिग च्याम्पियन बनेको चर्च ब्वाइज युनाइटेडले उपाधिसहित १५ लाख हात पार्यो । लिगको सर्वाधिक गोलकर्ता चर्च ब्वाइजकै आशिष चापागाईं बने । उनले लिगमा ११ गोल गरेका थिए । दोस्रो स्थानमा रहेको खुमलटार एफसीले २२ अंक जोडेको थियो । चर्च ब्वाइज ‘बी’ मा बढुवा भएको एकै वर्षमा ‘ए’ डिभिजनमा उक्लिएको हो । चर्चले लिग जित्दा सँगै ‘ए’ डिभिजन प्रवेश गरेको खुमलटार रेलिगेसन जोनमै छ ।

लिगमा २५ खेल खेल्दै १२ जित ४ हार र ९ बराबर ४५ अंक जोडेर लिग च्याम्पियन बनेको चर्च ब्वाइज युनाइटेडले उपाधिसहित ७५ लाख हात पार्नेछ । साविक विजेता मच्छिन्द्र फुटबल क्लबभन्दा एक खेल बढी खेले पनि ६ अंकको अग्रता छ ।

खुमलटारसँग खेल्न बाँकी रहेको चर्च ब्वाइज ४५ अंक पुगेको छ । दोस्रोमा रहेको मछिन्द्रको ३९ अंक छ । अब अर्को खेल चर्च ब्वाइजले हार्दा र मच्छिन्द्रले अब खेल्ने दुवै खेल जितेर अंक बराबरी गर्दा पनि हेड टु हेडका आधारमा लिग चर्च ब्वाइजले जित्ने छ ।