साउदीको अल-हिलालले युरोपमा खेल्दै आएका अर्का खेलाडी भित्र्याउने

काठमाडौँ- साउदी अरेबियन क्लब अल-हिलालले युरोपमा खेल्दै आएका अर्को एक खेलाडी भित्र्याउने भएको छ । साउदी क्लबहरुले एक पछि अर्को खेलाडी भित्र्याउँदै गर्दा पछिल्लो समय इंग्लिस क्लब वुल्भ्सका कप्तान रुबेन नेभेस अल-हिलालमा आबद्ध हुने बीबीसी जनाएको छ ।

क्रिस्टियानो रोनाल्डो र करिम बेन्जेमापछि साउदी क्लबमा आबद्ध हुनेमा पोर्चुगिज मिडफिल्डर नेभेस अर्का चर्चित खेलाडी बन्ने निश्चित भएको छ ।

---

नेभेसलाई अल-हिलालले ५५ मिलियन युरोमा वुल्भ्सबाट खरिद गर्न लागेको हो ।

आबद्ध भएको एक वर्षपछि नेभेसले वुल्भ्सलाई इंग्ल्यान्डको दोस्रो डिभिजन अर्थात च्याम्पियनसीपको उपाधि जिताएका थिए । साथै उनले इंग्लिस प्रिमियर लिगमा वुल्भ्सलाई लगातार दुई वर्ष सातौं स्थानमा राख्न मदत गरेका थिए ।

नेभेसले वुल्भ्सका लागि सबै प्रतियोगिताहरूमा २५३ खेल खेल्दै ३० गोल गरेका छन् ।