किरण चेम्जोङले पञ्जाब एफसीसँग गरे सम्झौता नवीकरण

काठमाडौँ- नेपाली राष्ट्रिय फुटबल टोलीका कप्तान किरण चेम्जोङले भारतीय क्लब पञ्जाब एफसीसँगको सम्झौता नवीकरण गरेका छन् । उनले पञ्जाबसँग एक वर्षको सम्झौता गरेको स्पोर्ट्स-किडाले जनाएको छ । 

पञ्जाब गत सिजन मात्रै इन्डियन सुपर लिग (आईएसएल) मा बढूवा भएको थियो । नयाँ सम्झौतासँगै चेम्जोङ कम्तीमा पनि २०२३-२४ सिजनको अन्त्यसम्म रहनेछन् ।

---

३३ वर्षीय चेम्जोङले गत सिजन पञ्जाबलाई आई-लिगको उपाधि जिताउन महत्त्वपूर्ण भूमिका खेलेका थिए । उनले २०२०-२१ आई-लिग सिजनमा गोल्डेन ग्लोभ्स अवार्ड जितेका थिए ।

पञ्जाबमा दोस्रो सिजन बिताउँदा चेम्जोङले आफ्नो दोस्रो आई-लिग उपाधि र अर्को गोल्डेन ग्लोभ्स अवार्ड जिते ।

अनन्त तामाङपछि इन्डियन सुपर लिगमा खेल्ने उनी दोस्रो नेपाली खेलाडी बन्ने छन् ।