डेब्यु खेलमै मेस्सीले गोल गर्दा मियामीको जित

काठमाडौँ- अर्जेन्टिनी स्टार फुटबलर लियोनल मेस्सीले डेब्यु खेलमै गोल गरेपछि अमेरिकाको इन्टर मियामीले लिग कपमा जित हात पारेको छ ।

फ्लोरिडास्थित डीआरभी पीएनके स्टेडियममा भएको खेलमा मियामीले क्रुज अजुललाई २-१ गोलले पराजित गरेको हो ।

---

मियामीको जितमा मेस्सी र रोबर्ट टेलर एक-एक गोल गरे । अन्टुनाले क्रुज अजुलका लागि एक गोल फर्काए ।

टेलरले ४४ औँ मिनेटमा गोल गर्दै मियामीलाई सुरुवाती अग्रता दिलाएका थिए । क्रुज अजुलका अन्टुनाले ६५ औँ मिनेटमा खेललाई १-१ को बराबरीमा पुर्‍याए ।

तर ५३ औँ मिनेटमा मैदान प्रवेश गरेका मेस्सीले दोस्रो हाफको इन्जुरी समयमा फ्रि-किकमार्फत् गोल गर्दै मियामीलाई जित दिलाए ।