इंग्लिस प्रिमियर लिग र स्पेनिश ला लिगा आजबाट सुरु हुँदै

काठमाडौँ- इंग्लिस प्रिमियर लिग र स्पेनिश ला लिगाको पहिलो चरणका खेलाहरु आजबाट सुरु हुँदैछ ।

प्रिमियर लिगको पहिलो खेलमा गत सिजनका प्रिमियर लिग विजेता र च्याम्पियनसीप विजेता भिड्दै छन् ।  

---

प्रिमियर लिग विजेता म्यानचेस्टर सिटी र च्याम्पियनसीप विजेता बर्नलीबीचको खेल नेपाली समय अनुसार राती १२:४५ बजेबाट सुरु हुनेछ ।

गत सिजन म्यानचेस्टर सिटीले ३८ खेलमा ८९ अंक जोड्दै प्रिमियर लिगको ट्रफी उचालेको थियो । म्यानचेस्टर सिटी जितका साथ यस सिजनको प्रिमियर लिग सुरु गर्न चाहन्छ भने बर्नलीलाई म्यानचेस्टर सिटीलाई हराउँदै च्याम्पियनसीपको फर्म निरन्तर राख्ने मौका छ ।

स्पेनिश ला लिगाको पहिलो खेलमा भने अल्मेरिया र रायो भालेकानो भिड्दै छन् । दुई टोलीबीचको खेल नेपाली समय अनुसार राती ११:१५ बजेबाट सुरु हुनेछ ।

गत सिजनको ला लिगा विजेता बार्सिलोनाले भने आफ्नो पहिलो खेल आइतबार राती गेटाफेविरुद्ध खेल्नेछ ।