फिफा विश्वकपः स्विडेनलाई हराउँदै स्पेन पहिलो पटक फाइनलमा

काठमाडौँ- स्पेन फिफा महिला विश्वकप फुटबलको फाइनलमा प्रवेश गरेको छ ।

न्यूजिल्यान्डको अकल्यान्डस्थित इडेन पार्कमा आज भएको पहिलो सेमिफाइनल खेलमा स्विडेनलाई २-१ गोलअन्तरले हराउँदै स्पेन फाइनलमा प्रवेश गरेको हो ।

---

स्पेन पहिलो पटक विश्वकपको फाइनलमा प्रवेश गरेको हो ।

स्पेनलाई पहिलो पटक फाइनलमा पुर्‍याउन सल्मा पारालुइलो र ओल्गा कारमोनाले एक-एक गोल गरे ।

स्विडेनका लागि रेबेका ब्लोमक्भिस्टले एक गोल फर्काइन् ।

१९ वर्षीया सल्मा पारालुइलोले ८१ औँ मिनेटमा गोल गर्दै स्पेनलाई अग्रता दिलाएकी थिइन् ।

तर स्विडेनकी रेबेकाले ८८ औँ मिनेटमा बराबरी गोल गरिन् ।

८९ औँ मिनेटमा ओल्गाले गरेको गोलसँगै स्पेन फाइनलमा प्रवेश गर्‍यो ।

स्पेनले अब फाइनलमा इंग्ल्यान्ड र सह-आयोजक अस्ट्रेलियाबीच हुने दोस्रो सेमिफाइनल खेलको विजेतासँग खेल्नेछ ।