यूइएफए सुपर कपको फाइनल खेल आज राति हुँदै

काठमाडौँ- गत सिजनको ट्रेबल विजेता म्यानचेस्टर सिटीले आज यूइएफए सुपर कपको फाइनल खेलमा स्पेनिश क्लब सेभिल्लासँग भिड्दै छ ।

सिटी र सेभिल्लाबीचको खेल ग्रीसको करैस्काकिस स्टेडियममा नेपाली समयअनुसार राति १२:४५ बजेबाट सुरु हुनेछ ।

---

सुपर कप यूइएफएले आयोजना गर्ने वार्षिक खेल हो जसमा अघिल्लो सिजनको च्याम्पियन्स लिग र युरोपा लिग विजेताहरूबीच प्रतिस्पर्धा हुन्छ ।

इन्टर मिलानलाई १–० गोलले पराजित गर्दै सिटीले च्याम्पियन्स लिगको उपाधि जित्दै सुपर कपको फाइनलमा प्रवेश गरेको हो ।

इटालियन क्लब एएस रोमालाई पेनाल्टीमा ४-१ गोलले पराजित गर्दै सेभिल्लाले युरोपा लिगको उपाधि हात पार्दै सुपर कपको फाइनलमा स्थान बनाएको हो ।

सेभिल्ला सातौँ पटक सुपर कपको फाइनल खेल्दै छ । उसले यसअघि एक पटकमात्र सुपर कपको उपाधि जितेको छ ।

सिटी भने पहिलो पटक सुपर कपको फाइनलमा खेल्दै छ ।