लिग वानः पीएसजीको पहिलो पराजय

काठमाडौँ- जारी सिजनको फ्रेन्च लिग वानअन्तर्गत साविक विजेता पेरिस सेन्ट जर्मेन (पीएसजी) ले पहिलो पराजय भोगेको छ ।

शुक्रबार राति भएको खेलमा पीएसजीले नाइससँग ३-२ गोलअन्तरको पराजय भोगेको हो ।

---

लिग वानअन्तर्गत पाँच खेल खेलेको पीएसजीको यो पहिलो पराजय हो । पीएसजीले २ खेलमा बराबरी खेल्दा २ खेलमा जित हात पारेको छ ।

८ अंकसहित पीएसजी तेस्रो स्थानमा छ । यता पाँचमध्ये २ खेलमा जित तथा ३ खेलमा बराबरीको नतिजा निकालेको नाइस भने ९ अंकसहित दोस्रो स्थानमा छ । चार खेलबाट १० अंक जोडेको मोनाको पहिलो स्थानमा छ ।

शुक्रबार राति नाइसलाई जित दिलाउन टेरेम मोफीले २ तथा गाएटन लाबोर्डेले एक गोल गरे । पीएसजीका लागि दुवै गोल काएलियन एमबाप्पेले फर्काए ।