प्रयागराज फुटसलः वडा ११, १३, २६ र १५ क्वार्टरफाइनलमा

काठमाडौँ- प्रयागराज सिंह सुवाल स्मृति अन्तर वडा फुटसल प्रतियोगितामा शनिबार वडा नं ११, १३, २६ र वडा नं १५ क्वार्टरफाइनलमा प्रवेश गरेका छन् ।

काठमाडौँ महानगरपालिकाका वडाहरुबीच लैनचौर फुटसल मैदानमा जारी प्रतियोगिताअन्तर्गत शनिबार वडा नं ११ ले वडा नं १२ लाई ३–२ ले पराजित गर्यो । विजयी टिमका लागि जनक सिलवाल, धनकुमार श्रेष्ठ र विक्रम महर्जनले गोल गरे । वडा नं १२ का लागि दुवै गोल मनोज महर्जनले फर्काए ।

---

दोस्रो खेलमा वडा नं १३ ले वडा नं २८ लाई ३–१ ले हरायो । वडा नं १३ का लागि अंकित खड्गी, आशिष कपाली र अभय रानाले गोल गरे । वडा २८ का उदेश खड्गीले सान्त्वना गोल गरे ।

तेस्रो खेलमा वडा नं २६ ले वडा नं ८ लाई २–० ले निराश बनायो । सो खेलमा दुवै गोल अनुक मसलले गरे ।

शनिबार भएको अन्तिम खेलमा वडा नं १५ ले वडा नं २ लाई २–० ले हरायो । वडा १५ का लागि सुरेश परियार र विशाल महर्जनले एक-एक गोल गरे ।

आइतबार प्रिक्वार्टरफाइनलअन्तर्गत वडा नं ९ र वडा नं ४, वडा नं २७ र वडा नं १७, वडा नं २२ र वडा नं ३२ तथा वडा नं २३ र वडा नं १४ बीच खेल हुनेछ ।