प्रिमियर लिगः साविक विजेता सिटीले जित्दा युनाइटेड पराजित

काठमाडौँ- इंग्लिस प्रिमियर लिग फुटबलअन्तर्गत साविक विजेता म्यानचेस्टर सिटीले जित हात पार्दा म्यानचेस्टर युनाइटेडले भने पराजय भोगेको छ ।

शनिबार राति सम्पन्न खेलमा म्यानचेस्टर सिटीले वेस्ट ह्यामलाई ३-१ ले पराजित गर्‍यो । सिटीको जितमा जेरेमी डोकु, बर्नार्डो सिल्भा र अर्लिङ हालान्डले एक-एक गोल गरे ।

---

वेस्ट ह्यामका लागि जेम्स वार्ड-प्रोजले एक गोल गरे ।

जारी सिजनमा सिटीको यो लगातार पाँचौँ जित हो । १५ अंक जोडेको सिटी शीर्ष स्थानमा छ ।

यता युनाइटेडले भने ब्राइटनसँग ३-१ को पराजय भोग्यो । ब्राइटनका लागि डेनी वेलबेक, पास्कल ग्रोब र जोआओ पेड्रोले एक-एक गोल गर्दा हानिबाल मेजब्रीले युनाइटेडका लागि एक गोल फर्काए ।

अन्य खेलमा लिभरपुलले उल्भ्सलाई ३-१, एस्टन भिल्लाले क्रिस्टल प्यालेसलाई ३-१ तथा टोटेनहमले शेफिल्डलाई २-१ ले पराजित गरे ।