सभापति कप : एनआरटी सेमिफाइनलमा प्रवेश

काठमाडौं - न्युरोड टिम (एनआरटी) सभापति कप फुटबल प्रतियोगिताको सेमिफाइनलमा प्रवेश गरेको छ । 

त्रिपुरेश्वरस्थित दरशथ रंगशालामा आइतबार सम्पन्न खेलमा फ्रेन्ड्स क्लबलाई ३–१ ले पराजित गर्दै एनआरटी सेमिफाइनलमा प्रवेश गरेको हो । जितसँगै एनआरटीले फाइनल प्रवेश गर्न आयोजक नेपाल लोकतान्त्रिक खेलकुद बागमती प्रदेशसंग खेल्नेछ ।

---

कप्तान अञ्जन विष्टको गोलमा एनआरटीले १९औं मिनेटमा सुरुआती अग्रता लिएको थियो । त्यसको पाँच मिनेटपछि नै उनले नै अग्रता दोब्बर बनाए । दोस्रो हाफको सुरुआतमै रिचर्ड विल्सनले एकल प्रयासमा गोल गर्दै अग्रता ३–० मा पुर्याए । 

८१ औं मिनेटमा फ्रेन्ड्सका कप्तान विवेक पौडेलले गोल फर्काएका थिए । प्रतियोगिता अन्तर्गत सोमबार पहिलो सेमिफाइनलमा संकटा क्लब र मच्छिन्द्र फुटबल क्लबबीच प्रतिष्पर्धा हुने छ ।  प्रतियोगिताको विजेताले २६ लाख पुरस्कार पाउनेछ । उपविजेता टोलीले १३ लाख रुपैयाँ प्राप्त गर्नेछ ।