साफ च्याम्पियनसिपः श्रीलंकासँग पनि बराबरीमा रोकियो भारत

काठमाडौँ-  माल्दिभ्सको मालेमा जारी साफ च्याम्पियनसिपमा भारत फेरि बराबरीमा रोकिएको छ । बिहीबार मालेको राष्ट्रिय रंगशालामा भएको लिग चरणको खेलमा भारतलाई श्रीलंकाले गोलरहित बराबरीमा रोक्न सफल भयो । यसअघि आफ्नो पहिलो खेलमा भारतले बंगलादेशसँग १-१ को बराबरी खेलेको थियो । 

दुई बराबरीबाट भारतको दुई अंक भएको छ । उता श्रीलंकाले भने पहिलो अंक बटुल्यो । पछिल्ला दुई खेलमा श्रीलंकाले पराजय भोगेको थियो । श्रीलंकालाई पहिलो खेलमा बंगलादेशले पराजित गरेको थियो भने दोस्रो खेलमा नेपालले हराएको थियो । 

---

यसपालिको साफ च्याम्पियनसिपमा अपराजित नेपाल र बंगलादेश शीर्ष दुईमा छन् । दुई जितबाट नेपालको ६ अंक छ भने उति नै खेल खेलेको बंगलादेशको चार अंक छ । 

बिहीबार राति हुने खेलमा आयोजक माल्दिभ्स र बंगलादेश आमने सामने हुँदैछन् । उद्घाटन दिनको दोस्रो खेलमा नेपालसँग स्तब्ध बनेको माल्दिभ्सले लिग चरणको दोस्रो खेल खेल्न लागेको हो ।