कन्काई र ललितपुर नकआउट चरणमा

काठमाडौँ- कन्काई नगरपालिका र ललितपुर महानगरपालिकाले सोमबार उपमेयर कप राष्ट्रिय महिला फुटबल लिग छनौटको नकआउट चरणमा स्थान पक्का गरेका छन् । कन्काई समूह ‘ए’ को विजेता र ललितपुर समूह ‘बी’को विजेता बन्दै छनौटको नकआउट चरणमा पुगेका हुन् । 

ललितपुरको सातदोबाटोस्थित अखिल नेपाल फुटबल संघ (एन्फा)को मैदानमा जारी प्रतियोगितामा झापाको कन्काईले सोमबार सर्लाहीको बागमती नगरपालिकासँग १–१ को बराबरी खेल्यो । बराबरीसँगै दुई टिमको समान सात–सात अंक भयो । तर गोल अन्तरको आधारमा कन्काई अघि बढ्यो । 

---

सोमबार नै भएको अर्को खेलमा ललितपुर कालिका नगरपलिकासँग १–१ को बराबरीमा रोकियो । आफ्नो पछिल्लो खेलमा कागेश्वरी मनहरा नगरपालिकालाई पराजित गरेको ललितपुरले दुई खेलबाट चार अंक संकलन गर्‍यो र नकआउटका लागि छनौट भयो ।