युभेन्टस पराजित, एएस रोमा र इन्टर विजयी

काठमाडौँ- इटालियन सिरी ए फुटबलमा युभेन्टस पराजित हुँदा एएस रोमा र इन्टर मिलान भने विजयी भएका छन् । 

बुधबार राति भएको खेलमा युभेन्टस सासओलोसँग पराजित हुँदा एएस रोमाले काग्लियारीलाई पराजित गर्‍यो भने इन्टर मिलनले १० खेलाडीमा सीमित इम्पोलीलाई पराजित गरेको हो । 

---

घरेलु मैदान टुरिनमा युभेन्टस सासओलोसँग २-१ गोल अन्तरले पराजित भएको हो । खेलको ४४औँ मिनेटमा डाभिड फ्राटेस्सीले गोल गर्दै सासओलोलाई सुरुआती अग्रता दिलाएका थिए । खेलको ७६औँ मिनेटमा वेस्टन म्याकेन्नीले गोल गर्दै युभेन्टसलाई १– १ गोलको बराबरीमा फर्काए ।

त्यसपछि खेलको इन्जुरी समयमा म्याक्सिम लोपेजले गोल गर्दै सासओलोलाई २–१ को जित दिलाए ।

जितसँगै सासओलोले १० खेलमा १४ अंक जोडेको छ । सासओलो नवौं स्थानमा छ । पराजित युभेन्टसले १० खेलमा १५ अंक जोड्दै सातौँ स्थानमा  छ ।

इन्टरले भने डानिलो र फेडेरिको मिमार्काेको गोलमा इम्पोलीलाई २-० गोल अन्तरले पराजित गरेकाे छ । जितसँगै इन्टर १० खेलबाट २१ अंक सहित तेस्रो स्थानमा छ । 

एएस रोमाले एक गोलले पछि परको स्थिति उल्टाउँदै रोगर इबानेज र रोलेन्जो पेलग्रिनीको गोलमा काग्लियारीलाई २-१ गोल अन्तरले पराजित गर्‍याे । घरेलु टोली काग्लियारीको लागि लिओनार्दाे पाभालिटोले खेलको ५२ मिनेटमा अग्रता दिलाएका थिए । जितसँगै एएस रोमा १९ अंकका साथ चौथो स्थानमा छ । 

बुधबार राति नै भएका अन्य खेलमा लाजियोले फिओरेन्टिनालाई १–० गोल अन्तरले हरायो । एटलान्टाले सम्पाडोरियालाई ३–१ गोल अन्तर तथा उडिनेस र हेलास भेरोनाले १–१ को बराबरी खेले ।