जाभी बिहीबार बार्सिलोनाको प्रशिक्षकमा नियुक्त हुने

काठमाडौँ- बार्सिलोनाले बिहीबारसम्ममा जाभी हर्नान्डेजलाई प्रशिक्षकमा नियुक्त गर्ने भएको छ । स्पेनको अखबार स्पोर्टका अनुसार बार्सिलोनाको एक टोली कतारको दोहा पुगिसकेको छ । जहाँ बार्सिलोनाका उपाध्यक्ष राफा युस्तु र फुटबल निर्देशक माट्यु एलेमेनीले जाभी कार्यरत क्लब अल सादका मालिक मोहम्मद बिन हमादसँग छलफल गर्ने तालिका छ । 

दुई पक्षबीच बुधबार नै छलफल गर्ने र सकभर बुधबार नै सहमतिमा पुग्ने अपेक्षा गरिएको छ । अल सादसँग जाभीको सम्झौता नसकिएकाले कतारी क्लबसँग सहमति नगरी उनलाई बार्सिलोनाले प्रशिक्षकमा नियुक्त गर्न सक्दैन । 

---

योजना अनुसार सबै कागजी कार्य बिहीबारसम्म सकिए जाभीले यो साता नसकिँदै बार्सिलोना पुग्ने अपेक्षा गरिएको छ । यस साता स्पेनिस ला लिगामा बार्सिलोनाले सेल्टा भिगोको सामना गर्दैछ । यो खेलका लागि जाभी तयार नहुने भए पनि सोमबार उनलाई क्याम्प नौउमा नयाँ प्रशिक्षकका रूपमा प्रस्तुत गरिने सम्भावना बलियो छ ।