ए डिभिजन लिगको मुख्य प्रायोजक कतार एयरवेज

काठमाडौँ- यसपालिको सहिद स्मारक ‘ए’ डिभिजन लिगको मुख्य प्रायोजकमा कतार एयरवेजले निरन्तरता पाउने भएको छ । गत सिजनको लिगलाई पनि प्रायोजन गरेको कतार एयरवेजले अखिल नेपाल फुटबल संघ (एन्फा)सँग बुधबार सम्झौता नवीकरण गरेको हो । 

ललितपुरको सातदोबाटोमा रहेको एन्फा मुख्यालयमा आयोजित कार्यक्रममा एन्फा अध्यक्ष कर्मा छिरिङ शेर्पा र कतार एयरवेजका कन्ट्री म्यानेजर मोहमद एल इमामले सम्झौता पत्रमा हस्ताक्षर गरे । सम्झौताको रकम एक करोड ५० लाख रहेको बताइएको छ । 

---

पछिल्लो पटक ए डिभिजन लिग २०७६ सालमा भएको थियो । २०७७ सालमा भने कोभिड-१९ महामारीका कारण लिग आयोजना भएन । यो सिजनको लिग भने आउँदो शुक्रबारदेखि सुरु हुँदैछ ।