काठमाडौँ- काठमाडौँमा शुक्रबारबाट सुरु भएको सहिद स्मारक ‘ए’ डिभिजन लिगको पहिलो खेलमा फ्रेन्ड्स क्लब र सातदोबाटो युथ क्लबले गोलरहित बराबरी खेलेका छन् । दशरथ रंगशालामा भएको खेलमा सातदोबाटो तुलनात्मक रुपमा बलियो देखिए पनि गोल गर्न सकेन । 

पहिलो हाफमा सातदोबाटोले केही राम्रा मौका सिर्जना गरेका थियाे । ३३ औँ मिनेटमा मानबहादुर तामाङको फ्रिकिकबाट प्राप्त गरेको बललाई गोलमा परिणत गर्ने मौका थियो आकाश बुढा मगरसँग । तर उनको हेडर थोरैले बाहिरिदा सातदोबाटो अग्रता बनाउनबाट चुक्यो । 

---

दोस्रो हाफमा पनि सातदोबाटोले गोल गर्ने मौका पायो । तर उसका अफ्रिकी स्ट्राइकर मार्टिन्स अजायीले बक्सभित्रबाट पनि गोल गर्न सकेनन् । ५९ औँ मिनेटका फ्रन्ड्सका नाथनियल गार्सियाले खाली पोस्टमा गोल गर्न सकेनन् । 

बराबरीसँगै दुवै टिमले एक–एक अंक बाँडेका छन् । लिगमा शनिबार दुई खेल हुनेछन् । दिनको पहिलो खेलमा हिमालयन शेर्पा क्लबले संकटा क्लबको सामना गर्नेछ । दोस्रो खेलमा भने थ्री स्टार क्लब र च्यासल युथ क्लबबीच प्रतिस्पर्धा हुनेछ ।