म्यानचेस्टर युनाइटेडले सोल्स्यारको बिदाइ गर्ने

काठमाडौँ- इंग्लिस प्रिमियर लिगमा शनिबार राति म्यानचेस्टर युनाइटेडले वाटफोर्डसँग अप्रत्याशित पराजय भोग्यो । भिकारज रोडमा भएको खेलमा वाटफोर्डले चार गोल गर्‍यो । युनाइटेडले भने एक गोल मात्रै फर्कायो । जारी सिजन युनाइटेडका लागि यो पाँचौँ हार हो । यससँगै युनाइटेड सातौँ स्थानमा खुम्चिएको छ । उसको खातामा १७ अंक छ । जुन चौथो स्थानको वेस्टह्यामको भन्दा ६ अंकले कम हो । 

लिग च्याम्पियन बन्‍ने उदेश्यले सिजनको सुरुवात गरेको युनाइटेड शीर्ष ६ मा समेत नपरेपछि प्रशिक्षक ओले गनर सोल्स्यारको बर्खास्तीको हल्ला चल्न सुरु भएको छ । बेलायती अखबार दी गार्डियनका अनुसार शनिबार राति बसेको युनाइटेड प्रशासनको आपतकालिन बैठकले सोल्स्यारको बिदाइ गर्ने निर्णय गरेकाे हाे।

---

आपसी समझदारीमा सोल्स्यारले क्लब छाड्ने बताइएको छ । ताकि युनाइटेडले उनलाई सिधै हटाएको सन्देश नजाओस् । यसो भएमा सोल्स्यारले युनाइटेडका तर्फबाट क्षतिपूर्ति पनि पाउनेछन् । कति क्षतिपूर्ति दिने भन्नेमा युनाइटेड र सोल्स्यारबीच थप छलफल हुने गार्डियनको रिपोर्टमा उल्लेख छ । 

सोल्स्यारले युनाइटेड छाडेपछि उनको स्थानमा तत्कालका लागि माइकल क्यारिक र डारेन फ्लेचर रहनेछन् । क्यारिक हाल सोल्स्यारका सहायकका रुपमा कार्यरत छन् भने फ्लेचर प्राविधिक निर्देशक हुन् । दुवै युनाइटेडका पूर्वखेलाडी हुन् ।