म्यानचेस्टर युनाइटेडबाट बिदा भए सोल्स्यार, क्यारिक बने अन्तरिम प्रशिक्षक

काठमाडौँ- ओले गनर सोल्स्यारले आइतबार म्यानचेस्टर युनाइटेड छाडेका छन् । विज्ञप्ति जारी गर्दै युनाइटेडले सोल्स्यारले पदत्याग गरेको पुष्टि गरेको हो । शनिबार राति इंग्लिस प्रिमियर लिगमा वाटफोर्डसँग ४–१ को अप्रत्याशित हार बेहोरेपछि सोल्स्यारको ओल्ड ट्राफोर्ड छाड्ने हल्ला चल्न सुरु भएको थियो । 

वाटफोर्डसँग हारेपछि युनाइटेड प्रशासनको आपतकालिन बैठक बसेको थियो । जसले सोल्स्यारको बिदाइ गर्ने निर्णय गरेको थियो । ‘सोल्स्यारले युनाइटेडमा अत्यन्तै मेहेनत गरे । उनी युनाइटेडको लेजेन्डका रुपमा रहिरहने छन् । उनले यो क्लबलाई खुशीका धेरै क्षण दिएका छन् । उनको लागि युनाइटेडको ढोका सधैँ खुला रहनेछ । तत्कालका लागि युनाइटेडमा उनको स्थान माइकल क्यारिकले लिने छन्,’ युनाइटेडले भनेको छ । 

---

लामो समय युनाइटेडबाट खेलेका सोल्स्यार डिसेम्बर, २०१८ मा ओल्ड ट्राफोर्ड फर्किएका थिए । सुरुमा कामचलाउ प्रशिक्षकको जिम्मेवारी पाएका सोल्स्यारले युनाइटेडसँग मार्च, २०१९ मा तीन वर्षका लागि सम्झौता गरे । जुलाई, २०२१ मा उनले फेरि नयाँ सम्झौता गरे । यस अनुसार युनाइटेडसँगको उनको सम्झौता सन् २०२५ मा मात्रै सकिने थियो ।