रियल मड्रिड र एथ्लेटिकोको जित

काठमाडौँ- स्पेनिस ला लिगामा लिग लिडर रियल मड्रिडले दशौँ जित निकालेको छ । आइतबार राति भएको खेलमा घरेलु टोली रियलले १ गोलले पछि परेको स्थिति उल्‍टाउँदै सेभियामाथि २-१ अन्तरको जित निकालेको हो । 

रियलको पुनरागमन जितमा करिम बेन्जेमा र भिनिसियस  जुनियरले १-१ गोल गरे । यसअघि सेभियाका राफा मिरले १२औँ मिनेटमा अग्रता बनाएका थिए । जितसँगै रियल मड्रिड १४ खेलमा १० जितसहित ३३ अंक बनाएको छ । आइतबार राति नै भएको खेलमा एथ्लेटिको मड्रिडले काडिजलाई ४-१ गोल अन्तरले पराजित गर्‍यो ।

---

एथ्लेटिकोको जितमा थोमस लेमार, एन्टोनियो ग्रीजम्यान, एन्जेल कोरिया र म्याथ्युस कोन्हाले १-१ गोल गरे । काडिजको लागि एन्थोनी लोजानोले सान्त्वना गोल फर्काए । जितसँगै एथ्लेटिको १४ खेलबाट २९ अंक बनाएर दोस्रो स्थानमा छ ।