लिगमा सातदोबाटोको पहिलो हार, एनआरटीको पहिलो जित

काठमाडौँ- सहिद स्मारक ‘ए’ डिभिजन लिगमा सातदोबाटो युथ क्लबको अपराजित यात्रामा पूर्णविराम लागेको छ । शनिबार दशरथ रंगशालामा सातदोबाटोलाई न्युरोड टिम (एनआरटी)ले १–० ले पराजित गर्‍यो । एनआरटीका लागि विजयी गोल स्टिफन समिर बिनोङगले गरे । 

यो जितसँगै एनआरटी सातौँ स्थानमा उक्लेको छ । पछिल्ला तीन खेलमा दुई बराबरी र एक हार बेहारेको एनअरटीले शनिबार लिगमा पहिलो जित दर्ता गरेको हो । सातदोबाटो भने तेस्रो स्थानमै छ । उसको खातामा चार खेलबाट सात अंक भएको छ । 

---