मछिन्द्र शीर्ष स्थानमा, मनाङको चुनौती कायमै

काठमाडौँ- काठमाडौँमा जारी सहिद स्मारक ‘ए’ डिभिजन लिगमा शनिबार मछिन्द्र फुटबल क्लबले हिमालयन शेर्पा क्लबमाथि ३–० को जित दर्ता गरेको छ । गत सिजनको च्याम्पियन मछिन्द्रलाई सजिलो जित दिलाउन सुनिल बल, नुर्लान नोभ्रुजोभ र विमल घर्ती मगरले एक–एक गोल गरेका थिए ।  

लिगमा तेस्रो जित हासिल गरेपछि मछिन्द्र अंक तालिकाको शीर्ष स्थानमा उक्लिएको छ । चार खेल खेल्दा १० अंक बटुलेको मछिन्द्र अपराजित छ । मछिन्द्रकै जति अंक भएको मनाङ मस्र्याङ्दी क्लब गोल अन्तरका कारण दोस्रो स्थानमा छ । 

---

पराजित हिमालयन शेर्पा भने १२ औँ स्थानमा छ । उसले अहिलेसम्म चार खेलबाट दुई अंक मात्रै बटुल्न सकेको छ । १४ टिम सम्मिलित लिगको रेलिगेसन क्षेत्रमा एपीएफ फुटबल क्लब र जावालाखेल युथ क्लब छन् । 

सातौँ चरण सकिँदा पहिलो स्थानमा रहने एएफसी लाइसेन्सधारी टिम एएफसी कप छनौटका लागि छानिने प्रावधान छ । यसकारण मछिन्द्र र मनाङबीचको प्रतिस्पर्धा पेचिलो बन्‍ने देखिएको छ ।

यी दुई टिमलाई त्रिभुवन आर्मी फुटबल क्लबले पछ्याइरहेको छ । आर्मी हाल तेस्रो स्थानमा छ । उसको खातामा आठ अंक छ । एएफसी लाइसेन्स भएकाले लगातार दोस्रो सिजन एएफसी कप छनौट खेल्ने आर्मीको सपना टुंगिसकेको छैन ।