लिगमा ५० औँ गोल हुँदा संकटाको जित

काठमाडौँ- निरज बस्नेतले सहिद स्मारक ‘ए’ डिभिजन लिगको ५० औँ गोल गरेपछि संकटा क्लबले सोमबार नेपाल पुलिस क्लबलाई १–० ले स्तब्ध बनाएको छ । दहरथ रंगशालामा भएको खेलमा निरजले १८ औँ मिनेटमा गोल गरे । जुन संकटालाई तीन अंक दिलाउन पर्याप्त रह्यो । 

विभागीय टिमलाई हराएसँगै संकटा चौथो स्थानमा उक्लिएको छ । संकटाको खातामा चार खेलबाट आठ अंक भएको छ । जारी लिगमा अपराजित संकटा र तेस्रो स्थानको त्रिभुवन आर्मी फुटबल क्लबको अंक बराबर भएको छ । पराजित पुलिस भने सातौँ स्थानमा छ । छैटो, सातौँ र आठौँ स्थानमा रहेका थ्रीस्टार क्लब, पुलिस र न्युरोड टिमको समान पाँच–पाँच अंक छ । तर गोल अन्तरले थ्रीस्टार बाँकी दुई टिमभन्दा अगाडि रहेको हो । 

---

चौथो चरणमा एक खेल बाँकी रहँदा मछिन्द्र फुटबल क्लब लिगको शीर्ष स्थानमा छ । मछिन्द्रले चार खेलबाट १० अंक बटुलेको छ । दोस्रो स्थानमा रहेको मनाङ मस्र्याङ्दी क्लबको पनि १० अंक छ । तर गोल अन्तरमा मनाङ दोस्रो स्थानमा सीमित भएको हो ।