बेन्जिमाले तीन मिनेटको अन्तरमा दुई गोल गर्दा रियललाई आठ अंकको अग्रता

काठमाडौँ- फरवार्ड करिम बेन्जिमाले तीन मिनेटको अन्तरमा दुई गोल गरेपछि स्पेनिस ला लिगामा जित हासिल गर्दै रियल म्याड्रिडले तालिकामा आठ अंकको अग्रता बनाएको छ । बुधबार राति भ्रमणकारी टोली रियलले एथ्लेटिको क्लबमाथि २–१ अन्तरको जित निकालेको हो । बिल्बाओ भएको खेलमा बेन्जिमाले खेलको ४ र ७ मिनेटमा लगातार दुई गोल गरेपछि रियलले सुरुआतबाटै खेलमा पकड बनाएको थियो ।

१०औँ मिनेटमा आइहान सान्सेटले एथ्लेटिकोको लागि अन्तर घटाएपनि खेलमा फर्कन सकेन । जितसँगै रियलले १९ खेलबाट ४७ अंक बनाएको हो । दोस्रो स्थानको सेभियाको ३८ अंक रहेको छ । सेभिया अघिल्लो रात बार्सिलोनासँग रोकिएको छ । पराजित एथ्लेटिकोको समान खेलबाट १९ अंकसहित १० औं स्थानमा छ । 

---

राति नै भएको खेलमा सुरुआती अग्रता जोगाउन नसक्दा एट्लेटिको म्याड्रिड ग्रानडासँग २-१ अन्तरले पराजित भयो । ग्रानडाको घरेलु मैदानमा जोआओ फेलिक्सको गोलमा एट्लेटिकोले दूई मिनेटमै अग्रता बनाएको थियो । १७औँ मिनेटमा डार्विन माचिसले बराबरी गोल गरे । ६१औँ मिनेटमा जर्ज मोलिनाले विजयी गोल गरे । हारसँगै एट्लेटिको २९ अंकसहित पाँचौ स्थानमा झरेको छ ।