फ्रेन्ड्स क्लब रेलिगेसन क्षेत्रमा यथावत

काठमाडौँ- सहिद स्मारक ए डिभिजनमा शुक्रबारका दुवै खेल बराबरीमा टुंगिएको छन् । दशरथ रंगशालामा भएको दिनको पहिलो खेलमा एपीएफ फुटबल क्लब र न्युरोड टिम (एनआरटी)ले ३–३ को बराबरी खेलेका थिए । सोही मैदानमा भएको दोस्रो खेलमा भिडेका नेपाल पुलिस क्लब र फ्रेन्ड्स क्लबले भने गोल गर्न सकेनन् । 

शुक्रबारको नतिजापछि फ्रेन्ड्स रेलिगेसन क्षेत्रमा यथावत छ । कुल १४ टिम सहभागी लिगमा फ्रेन्ड्स तीन अंकका साथ पुच्छारमा छ । ६ खेल खेलेको फ्रेन्ड्सभन्दा माथि पाँच खेल खेलेको च्यासल युथ क्लब छ । च्यासलको खातामा चार अंक छ । रेलिगेसन ब्याटलमा यी दुई क्लबबाहेक जावालाखेल युथ क्लब पनि देखिएको छ । १२ औँ स्थानको जावालाखेलको खातामा पाँच खेलबाट चार अंक छ । 

---

उता पुलिस भने अंक तालिकाको मध्यभागमा छ । ६ खेलबाट ६ अंक जम्मा गरेको पुलिस आठौँ स्थानमा छ । पाँच खेल खेलेको थ्रीस्टारको पनि ६ अंक नै छ । तर गोल भिन्नतामा ललितपुरे क्लबले सातौँ स्थानमाथि कब्जा जमाएको हो ।