काठमाडौँ- हिमालयन शेर्पा क्लबले जारी सहिद स्मारक ए डिभिजन लिगमा लगातार दोस्रो जित दर्ता गरेको छ । शनिबार दशरथ रंगशालामा भएको खेलमा च्यासल युथ क्लबलाई ३–१ ले पराजित गरेपछि हिमालयन शेर्पाले यो सिजनको दोस्रो पटक तीन अंक बटुल्न सफल भयो । 

शनिबारको खेलमा हिमालयन शेर्पाका लागि मुटाम्बा पिस्टोनेले दुई गोल गरे भने अर्को गोल सुरेश कुमालको नाममा रह्यो । च्यासलका लागि एक मात्र गोल रुमेश बरतौलाले गरे । 

---

हिमालयन शेर्पाले पछिल्लो खेलमा बिग्रेड ब्योइज क्लबलाई हराएको थियो । जुन उसका लागि यो सिजनको पहिलो जित थियो । च्यासललाई हराएसँगै हिमालयन शेर्पा छैटौँ स्थानमा उक्लिएको छ । ६ खेल खेलेको हिमालयन शेर्पाको पोल्टामा अब आठ अंक भएको छ । 

पराजयपछि च्यासल भने रेलिगेसन क्षेत्रमा झरेको छ । लगातार दोस्रो हार बेहोरेपछि च्यासल १३ औँ स्थानमा यथावत छ । फ्रेन्ड्ससँगै रेलिगेसन क्षेत्रमा रहेको च्यासलको खातामा ६ खेलबाट चार अंक छ ।