लिगमा संकटा अझै अपराजित

काठमाडौँ- संकटा क्लब काठमाडौँमा जारी सहिद स्मारक ए डिभिजन लिगको तेस्रो स्थानमा उकिलएको छ । आइतबार बिग्रेड ब्योइज क्लब (बीबीसी)लाई ३–० ले पराजित गर्दै संकटा शीर्ष तीनभित्र प्रवेश गरेको हो । संकटा लिगमा अपराजित छ ।  

दशरथ रंगशालामा भएको खेलमा संकटालाई जिताउन उत्तम राईले दुई गोल गरे । अर्को गोल लक्ष्मण रुचालले गरे । यो जितसँगै संकटाको खातामा ६ खेलबाट १२ अंक जम्मा भएको छ । शीर्ष दुईमा रहेका मछिन्द्र फुटबल क्लब र मनाङ मस्र्याङ्दी क्लबको पोल्टामा क्रमशः १४ र १३ अंक छ । 

---

चौथो स्थानमा रहेको त्रिभुवन आर्मी क्लबको खातामा भने नौ अंक छ । उसले शीर्ष तीनमा रहेका टिमहरूको भन्दा एक खेल कम खेलेको छ । उता संकटासँग पराजित भएको बीबीसीसँग भने पाँच अंक छ । र, उ अंक तालिकाको १० औँ स्थानमा छ ।