लुकाकु बेखुश छन् भन्‍ने कुरा चेल्सीमा कसैलाई पनि थाहा छैन: थोमस टुकेल

काठमाडौँ- रोमेलु लुकाकुले स्काई इटालियालाई तीन साताअघि एउटा अन्तरवार्ता दिएका थिए । त्यस अन्तरवार्तामा लुकाकुले चेल्सी बसाइमा आफू असन्तुष्ट नरहेको बताएका रहेछन् । सो अन्तरवार्ता हालै रिलिज गरिएको छ । ढिलोगरी रिलिज गरिएको अन्तरवार्ताले चेल्सीमा तरंग ल्याएको छ । 

‘चेल्सीमा मलाई उपयुक्त हुने किसिमको रणनीति बनाइँदैन । प्रशिक्षकले फरक शैलीको खेल खेलाइरहेका छन्,’ लुकाकुले इटालियन टेलिभिजनसँग भनेका छन् । उनले आफू कुनैदिन इन्टर मिलान फर्कनसक्ने पनि खुलासा गरेका छन् । ‘जुन तरिकाले मैले इन्टर छाडे, त्यसले इन्टर समर्थकको चित्त दुखेको छ । म सबैसँग माफी माग्न चाहन्छु । म के पनि भन्न चाहन्छु भने म इन्टर र समर्थकलाई सम्मान गर्छु । भविष्यमा म इन्टर फर्कन चाहन्छु,’ लुकाकुको भनाइ थियो । 

---

लुकाकुको अभिव्यक्ति बेलायती मिडियाको हेडलाइन बनिरहँदा चेल्सी प्रशिक्षक थोमस टुकेललाई यसबारे प्रश्न गरियो । ‘अब रोमेलुले के प्रतिक्रिया दिन्छन् भनेर पर्खेर बसेको छु । उनी चेल्सीमा बेखुश छन् भन्‍ने कुरा मलाई थाहा छैन । न त चेल्सीमा अरु नै यसबारे जानकार छन् । यसकारण लुकाकुको अभिव्यक्तिले हामीलाई अचम्ममा पारेको छ । यो क्लबमा उनी बेखुश हुनुपर्ने कुनै कारण छैन,’ टुकेलले भने । 

लुकाकु यसै सिजन मात्रै चेल्सी फर्किएका हुन् । दुई सिजन इन्टरमा रही इंग्लिस प्रिमियर लिगमा पुनरागमन गरेका लुकाकुले सोचे अनुसारको खेल देखाउन सकेका छैनन् । गत सिजन इटालियन लिग सिरी ए च्याम्पियन बनेको इन्टरका लागि लुकाकुले २४ लिग गोल गरेका थिए । तर चेल्सीमा भने उनले १३ लिग खेलमा चार गोल मात्रै गर्न सकेका छन् । 

यो सिजन चोटका कारण केही खेल गुमाएका लुकाकु कोभिड–१९ संक्रमणमा परेका थिए । यसकारण पनि चेल्सीको जर्सीमा लुकाकुले स्वभाविक लय देखाउन नसकेको बताइँदैछ । यद्यपि पछिल्ला दुई खेलमा उनले लगातार गोल गरेका छन् । 

चेल्सीले आइतबार राति लिभरपुलको सामना गर्दैछ । लिगमा दोस्रो स्थानमा रहेको चेल्सीले यो खेलमा जित हात पार्दै लिग लिडर म्यानचेस्टर सिटीसँगको दूरी घटाउने लक्ष्य बनाएको छ । शनिबार आर्सनलसँग प्रतिस्पर्धामा उत्रन लागेको सिटी चेल्सीभन्दा आठ अंकले अगाडि छ । लिभरपुलसँगको महत्वपूर्ण खेलअघि आयोजित पत्रकार सम्मेलनमा टुकेलले लुकाकुको अन्तरवार्ताले अनावश्यक हल्ला फैलाएको टिप्पणी गरे । 

‘वर्तमान अवस्थामा हामीलाई शान्त वातावरणको आवश्यकता छ । तर लुकाकुको अन्तरवार्ताले वातावरणलाई बिथोल्ने काम गरेको छ । यद्यपि लुकाकु जत्तिको खेलाडीको अन्तरवार्ताका कारण यो स्तरको हल्ला हुनु स्वभाविक हो । तर हामीले केही विषयमा छलफल गर्न आवश्यक छ भने त्यो कोठाभित्र हुनेछ । जे जे हल्ला भएपनि उनी बेखुश छन् भन्‍ने चाहिँ मलाई लाग्दैन,’ टुकेलले भने ।