सुनिलको गोलले मछिन्द्र एएफसी कपको छनौटमा

काठमाडौँ- मछिन्द्र क्लबले यसपालि एएफसी कपको छनौटमा खेल्ने पक्का भएको छ । आइतबार दशरथ रंगशालामा नेपाल पुलिस क्लबलाई १–० ले हराएपछि मछिन्द्र लिगको शीर्ष स्थानमा उक्लिदै एएफसी कप छनौटका लागि छानिएको हो । 

पुलिसलाई पराजित गर्न सुनिल बलको गोल निर्णायक रह्यो । उनले पहिलो हाफको २१ औँ मिनेटमा गोल गरेका थिए । सुनिल लगातार दोस्रो खेलमा निर्णायक गोल गर्न सफल भएका हुन् । छैटौँ चरणको खेलमा मनाङ मस्र्याङ्दीमाथि मछिन्द्रले जित हात पार्दा पनि सुनिलले नै खेलको एक मात्र गोल गरेका थिए । आइतबारको नतिजासँगै मछिन्द्रले सात खेलबाट १७ अंक बनाएको छ । सात खेल नै खेलेको मनाङको खातामा १६ अंक छ । 

---

एएफसी कप एसियाली क्लब फुटबलको दोस्रो श्रेणीको प्रतियोगिता हो । यो प्रतियोगिताको प्रारम्भिक छनौटमा नेपालबाट लिग च्याम्पियनले भाग लिन पाउने व्यवस्था छ । तर एएफसी कपको छनौट सुरु हुँदा नेपाली लिग सकिने छैन । यस्तोमा लिगको सातौँ चरणको समाप्तीमा पहिलो स्थानमा रहने टिमले एएफसी कप छनौट खेल्नेछ । यसैकारण मछिन्द्रले एएफसी छनौट खेल्ने मौका पाएको हो ।