वायुसेवा निगमको पुनः संरचना गरिने

काठमाडौँ- सरकारले राष्ट्रिय ध्वजा वाहक नेपाल वायुसेवा निगम (नेपाल एयरलाइन्स)को पुनः संरचना गर्ने भएको छ ।

राष्ट्रपति रामचन्द्र पौडेलले आज सङ्घीय संसद्को संयुक्त बैठकमा प्रस्तुत गरेको सरकारको आगामी आर्थिक वर्ष २०८०/०८१ को नीति तथा कार्यक्रममा वायु सेवा निगमको पुनः संरचना गरिने उल्लेख छ ।

---

आर्थिक रूपमा निकै कमजोर बनेको वायुसेवा निगमलाई व्यावसायिक रूपमा सबल बनाउँदै बजार हिस्सा बढाउन सरकारले आवश्यक तयारी गरिरहेको छ । आन्तरिक उडानलाई प्रभावकारी बनाउन थप जहाज खरिद गरेर गन्तव्य विस्तार गर्ने निगमको योजना छ । निगमसँग अन्तर्राष्ट्रिय उडानमा दुई थान वाइड बडी र दुई थान न्यारो बडी जहाज छन् । आन्तरिकमा हाल दुई थान ट्वीनअटर जहाजले सेवा दिइरहेको छ ।

राष्ट्रपति पौडेलले आन्तरिक तथा अन्तर्राष्ट्रिय विमानस्थल एवं टर्मिनल भवनको स्तरोन्नति गरिने पनि बताए । उनले हवाईसम्बन्धी मापदण्ड कडाइको साथ पालना गर्नुका साथै निर्माण भएका अन्तर्राष्ट्रिय, क्षेत्रीय र आन्तरिक विमानस्थल पूर्ण क्षमतामा सञ्चालन गर्ने नीति सरकारको रहेको उल्लेख गरे ।