सरकारको भ्रष्टाचार विरोधी कदमले जनतामा नयाँ आशाको सञ्चार गराएको छ : प्रधानमन्त्री दाहाल

काठमाडौँ- प्रधानमन्त्री पुष्पकमल दाहालले सरकारले भ्रष्टाचारविरुद्ध र सुशासनको पक्षमा गरेका महत्वपूर्ण कामहरूले जनतामा नयाँ आशाको रक्तसञ्चार गराएको बताएका छन् ।

प्रधानमन्त्री दाहालले सरकारले पछिल्लो समय गरेका भ्रष्टाचारविरुद्ध र सुशासनको पक्षमा चालेको कदमहरूले जनतामा नयाँ आशासहितको नयाँ राष्ट्रिय एकता र समुन्नतिको जग खडा हुँदै गएको बताएका हुन् । आइतबार काठमाडौँमा आयोजित स्वर्गीय माधवप्रसाद मरहट्ठाको स्मृतिमा लेखिएको पुस्तक ‘माधव सर’को लोकार्पण कार्यक्रममा बोल्दै उनले सात महिनाको अवधिमा सरकारले हासिल गरेका उपलब्धिहरूले इमानदार भएर क्रियाशील रहँदा जस्तासुकै चुनौती छिचोलेर पनि अघि बढ्न सकिन्छ भन्ने विश्वास आफूलाई दिएको जिकिर गरे ।

---

प्रधानमन्त्री दाहालले सरकारको भ्रष्टाचार विरोधी अभियानमा दृढतापूर्वक साथ दिएको भन्दै आम नागरिकप्रति आभार पनि व्यक्त गरे ।

प्रधानमन्त्री दाहालले सरकारले नेपालको वाम–लोकतान्त्रिक आन्दोलनको मर्म र भावना अनुसार नेपाली जनताको दैनिक जीवन र अवस्था बदल्ने जमर्को गरिरहेको समेत दोहोर्याए ।

त्यस अवसरमा उनले मरहट्ठाले माओवादी जनयुद्धको विजारोपण, घोषणा, विकास र त्यसको शान्तिपूर्ण रूपान्तरणमा खेलेकाे भूमिकाको प्रशंसा गरेका थिए । उनले मरहट्ठालाई नेपालको कम्युनिष्ट आन्दोलनका एक बौद्धिक व्यक्तित्व एवं राजनीतिक नेताहरूका पनि गुरुका रूपमा चित्रण गरेका थिए ।