राष्ट्रपतिले गरे युरोप भ्रमण स्थगित

काठमाडौँ– राष्ट्रपति रामचन्द्र पौडेलले आफ्नो  युरोप भ्रमण स्थगित गरेका छन् । सोमबार  राष्ट्रपतिका  प्रेस सल्लाहकार किरण पोखरेले राष्ट्रपति पौडेलको भ्रमण स्थगित भएको जानकारी दिएका हुन् । 

राष्ट्रपतिको सचिवालयद्वारा जारी विज्ञप्तिमा प्राकृतिक विपत्ति आइरहेको बेला मुलुक छाड्न नहुने निष्कर्षका साथ भ्रमण स्थगित गरिएको जानकारी दिइएको छ ।

---

‘भ्रमण नेपाल सरकार मन्त्रिपरिषद्को बैठकले स्वीकृत गरेको भोलिपल्टै जाजरकोट केन्द्र विन्दु बनाएर  गएको विनाशकारी भूकम्पबाट  जाजरकोट र रुकुम पश्चिम लगायतका क्षेत्रमा ठूलो जनधनको क्षति  हुन गएकाले यो बेला मुलुक छाड्न उपयुक्त नहुने निष्कर्षसहित सम्माननीय राष्ट्रपति रामचन्द्र पौडेले युरोप भ्रमण स्थगित गर्नुभएको छ,’ विज्ञप्तिमा लेखिएको छ ।

फ्रान्सको पेरिसमा आयोजना हुने पेरिस पिस फोरममा भाग लिन राष्ट्रपति २२ कात्तिकमा  जाने  निर्णय मन्त्रिपरिषद्ले स्वीकृत गरेको थियो । 

 गत शुक्रबार जाजरकोटको बारेकोट गाउँपालिका-१ रामीडाँडालाई केन्द्रविन्दु बनाएर ६‍.४ रेक्टर स्केलको भूकम्पले जाजरकोट र रुकुम पश्चिममा गरी १५७ जनाको मृत्यु  र सय भन्दा धेरै घाइते भएका थिए ।