प्रधानमन्त्री दाहालले भनेः एक वर्षपछि अर्थतन्त्रमा सुधार आयो

काठमाडौँ- प्रधानमन्त्री पुष्पकमल दाहालले जनतासँग प्रत्यक्ष सरोकार राख्ने विभाग र कार्यालयहरूसँग नियमित छलफल गरिरहेको बताएका छन् । उनले मंगलबार सामाजिक सञ्‍जालमा लेख्दै एक महिनाको अवधिमा विभिन्न मन्त्रालयहरूसँग छलफल गरी समस्याको गाँठो फुकाउने काम भएको उल्लेख गरेका छन् । 

'एक्सन रूमबाट राष्ट्रिय गौरवका आयोजनाहरूको अनुगमन गरी नीतिगत समस्याको सम्बोधनसमेत गर्दै आएको छु,' उनले भनेका छन्,' परम्परागत सोच र औपचारिकताबाट देशको समृद्धि र विकास सम्भव छैन। त्यसका लागि हामी सबैले नयाँ सोच र योजनाका साथ काम गर्नैपर्दछ। त्यसैले प्रक्रिया छोट्याएर परिणाम दिने गरि काम गरौँ ।'

---

प्रधानमन्त्री दाहालले एक वर्षको अनवरत प्रयासपछि अर्थतन्त्रमा सकारात्मक सुधार आएको दाबी गरे । 'अहिले गरिएको प्रयासबाट पनि छिट्टै सकारात्मक र गुणात्मक परिणाम आउनेछ,' उनले भनेका छन् ।

आज सिंहदरबार २ वटा महत्वपूर्ण छलफलहरू भएको जानकारी दिएका छन् । उनका अनुसार कालीगण्डकी जलासययुक्त जलविद्युत् आयोजनाको कामलाई तीव्रता दिने । आगामी आर्थिक वर्षको नीति तथा कार्यक्रम र बजेटलाई रूपान्तरकारी बनाउने  । 

दुवै छलफलमा सरोकार मन्त्रालय, विभाग र निकायहरूलाई निर्देशन दिएको उनको भनाइ छ । 'अहिले गरिएको प्रयासबाट पनि छिट्टै सकारात्मक र गुणात्मक परिणाम आउनेछ,' उनले अगाडि थपे ।

उनले पुस १० गते राष्ट्रका नाममा सम्बोधन गरेका थिए । 'मेरो तेस्रो कार्यकालको दोस्रो वर्ष सिंहदरबारमा केन्द्रित भई परिणाममुखी काम गर्नेछु । त्यसअनुसार पुसदेखि बिहान १० बजे नै सिंहदरबार आएर सरकारी काममा केन्द्रित हुँदै आएको छु,' उनले प्रस्ट पारेका छन् ।