मन्त्रालयको कामलाई परिणाममुखी बनाउनुपर्छ : खानेपानीमन्त्री राई

काठमाडौँ- नवनियुक्त खानेपानीमन्त्री राजेन्द्रकुमार राईले मन्त्रालयको कामलाई परिणाममुखी र प्रभावकारी बनाउन निर्देशन दिएका छन् । खानेपानी मन्त्रालयमा पदबहालीपछि कर्मचारीलाई निर्देशन दिँदै उनले राजनीतिक र प्रशासनिक नेतृत्व मिलेर आमजनताले अनुभूति गर्नेगरी काम गर्नुपर्ने आवश्यकता औँल्याए ।

मन्त्री राईले आफूले सम्हाल्न लागेको मन्त्रालय जनताको प्रत्यक्ष सरोकारसँग जोडिएकाले सबैले अनुभूति प्राप्त गर्नेगरी कार्यसम्पादन गर्न पनि निर्देशन दिए । उनले भने, 'मेरोतर्फबाट धेरै भनिरहनुपर्ने जरुरी ठान्दिन । तपाईंहरूसँग लामो अनुभव र विज्ञता छ । जुन ढङ्गले काम गरिरहनुभएको छ, यो भन्दा गतिदिने गरी काम गरौँ, खानेपानीको हाहाकार छ, जनताको विश्वास जित्ने गरी सेवा प्रवाहलाई चुस्त तुल्याउने काम गरौँ ।'

---

उक्त मन्त्रालयका सचिव सुरेश आचार्यले मन्त्रालयको गतिविधिबारे मन्त्री राईलाई अवगत गराएका थिए । मन्त्री राईले पदबहालीपछि पहिलो निर्णयका रुपमा धेरै जनसङ्ख्या भएका सहरमा नदीबाट पाइपको सहायताले पानी तानेर वितरण गर्नका लागि सम्भाव्यता अध्ययनको लागि खानेपानी विभागले प्रदेश र स्थानीय तहसँग समन्वय गरेर सरोकारवालासँगको कार्यशाला गर्नेसम्बन्धी फाइलमा हस्ताक्षर गरे ।

यसअघि मन्त्री राईलाई मन्त्रालयमा सचिव आचार्यसहितका कर्मचारीले स्वागत गरेका थिए । मन्त्री राई यसअघि छोटो समय भूमि व्यवस्था, गरिबी निवारण तथा सहकारीमन्त्री बनेका थिए ।

विसं २०३५ मा तत्कालीन नेकपा मालेसम्बद्ध अनेरास्ववियुबाट राजनीतिक यात्रामा प्रवेश गरेका नवनियुक्त मन्त्री राई १४ वर्षको किशोर उमेरमै धनकुटास्थित गोकुण्डेश्वर माविमा स्वतन्त्र विद्यार्थी युनियनको सभापति भएका थिए । उनले अखिलको धनकुटा जिल्ला कमिटी अध्यक्ष, प्रजातान्त्रिक राष्ट्रिय युवा सङ्घको जिल्ला अध्यक्ष, किसान महासङ्घको केन्द्रीय सदस्य र नेकपा (एमाले) धनकुटा जिल्ला कमिटीको दुई कार्यकाल अध्यक्षको जिम्मेवारी सम्हालेका थिए । विसं २०७८ मा एमालेको दशौँ महाधिवेशनबाट नवनियुक्त मन्त्री राई केन्द्रीय सदस्यमा निर्वाचित भएका थिए ।

विसं २०४९ मा जिल्ला विकास समितिको सदस्य र २०५४ मा जिविस उपसभापतिको जम्मेवारी सम्हालिसक्नुभएका मन्त्री राईले स्नातकसम्म अध्ययन गरेका छन् । पिता तेजबहादुर र माता मोतीमाया राईका कोखबाट २०२२ साल भदौ २९ गते धनकुटाको पाख्रिबासमा जन्मिएका उनी यसअघि २०७४ को प्रतिनिधिसभा निर्वाचनमा धनकुटाबाट निर्वाचित भएका थिए ।

विभिन्न राजनीतिक गतिविधिमा सरिक भएबापत करिब साढे दुई वर्ष जेल जीवन व्यतित गर्नुभएका नवनियुक्त मन्त्री राई आन्दोलका क्रममा पटकपटक प्रहरी हिरासतमा परेका थिए ।