मन्त्री पाण्डेको चुनाैती - करोड होइन, कौडी खाएको पुष्टि गरे राजनीति छोडिदिन्छु

काठमाडौँ - संस्कृति पर्यटन तथा नागरिक उड्डनमन्त्री बद्री पाण्डेले मतियार र विचौलियासँग कहिल्यै पनि सम्झौता नगर्ने बताएका छन् । 

मंगलबार नेपाल विद्याश्रम संस्कृति माध्यमिक विद्यालयको स्वर्ण महोत्सवका अवसरमा राजधानीमा आयोजित कार्यक्रममा बोल्दै मन्त्री पाण्डेले इमान्दार भएर काम गर्न खोज्नेहरूलाई स्वार्थ समूहका कारण घेराबन्दीमा पार्न खोजेको बताएका हुन् ।

---

उनले भने- 'पहिला राजनीति गर्ने व्यक्तिहरू बलियो हुनुहुन्थ्यो । अहिले स्वार्थ समूहका शक्तिशाली भएको देखिरहेको छु । मैले तीन चार महिनाको अवधिमा निष्ठापूर्वक काम गरिरहँदा केही स्वार्थ समूहका मतियारले मलाई मान मर्दन गर्ने, मेरो मनोबल, आत्मबललाई गिराउने गरी काम गरिरहेका छन् ।

म यो पशुपति नाथको मन्दिर अगाडि प्रतिज्ञा गरेर भन्न सक्छु, करोड खाएको कुरा केही अनलाइनहरूलाई प्रयोग गरेर केही विचौलियाका मतियारहरूले आरोप लागएका छन्, कारोड त के कौडी खाएको खाएको पुष्टि गरेको दिन म पशुपतिको ढोका आगाडि आएर मेरो राजनीतिक जीवन परित्याग गर्ने प्रतिज्ञा गर्न चाहान्छु ।' 

उनले आफू स्वार्थ समूहका मतियार र विचौलियाहरूसँग कहिल्यै पनि सम्झौता नगर्ने बताए । उनले देश र राष्ट्रको हितका लागि जस्तोसुकै कदम चाल्न पनि पछि नहट्ने प्रष्ट पारे । 

उनले आफू संस्कृति पढेको, धर्मप्रति आस्था र विश्वास राख्ने व्यक्ति भएको उल्लेख गर्दै आफूले राजनीतिलाई सेवाभावको रुपमा बुझेको प्रष्ट पारे । 

राजनीतिक भित्र विकृति विसंगतीका मतियारहरुले तथ्य, प्रमाण र हल्लाका रुपमा सामाजिक सञ्जालको प्रयोग गर्दै अफवाह फैलाइएको भन्दै आक्रोश व्यक्त गरे ।  कुन व्यक्तिले राजनीतिलाई दूरुपयोग गरिरहेको छ ? कुन व्यक्तिले राजनीतिलाई सदुपयोग गर्नु भएको छ ? भन्दै उनले भने, म आत्मविश्वासको साथ भन्न सक्छु, बाल्मिकी क्याम्पसको स्ववियु सभापति हुँदा र मन्त्री हुँदा समेत आफ्नो जीवनशैलीमा कुनै परिवर्तन छैन ।

मंगलबार कांग्रेसकै सांसद राजेन्द्र बजगाईंले मन्त्री पाण्डेले क्यासिनो संचालनका लागि एक करोड कमिसन खाएको आरोप लगाएका थिए ।