उपनिर्वाचन शान्तिपूर्ण रुपमा सम्पन्न भएकामा गृहमन्त्रीद्वारा धन्यवाद

काठमाडौँ - गृहमन्त्री रमेश लेखकले स्थानीय तह उपनिर्वाचन शान्तिपूर्ण रूपमा सम्पन्न भएकामा सबैलाई धन्यवाद दिएका छन् । 

गृहमन्त्री लेखकले मतदानलाई शान्तिपूर्ण रुपमा सम्पन्न गर्न सहयोग गर्ने सबै मतदाता, निर्वाचन आयोग, राजनीतिक दल, सुरक्षाकर्मी, निजामति कर्मचारी, सञ्चारकर्मी तथा मतदानमा सहभागी सम्पूर्ण मतदातालाई धन्यवाद दिनुका साथै उहाँहरुप्रति आभार व्यक्त गरेको उनको सचिवालयले जनाएको छ ।    

---

निर्वाचन लोकतन्त्रको मेरूदण्ड भएको उल्लेख गर्दै गृहमन्त्री लेखकले शान्तिपूर्ण तथा भयरहित वातावरणमा मतदान सम्पन्न भएको सो कार्यका लागि सहयोग गर्ने सम्पूर्णलाई धन्यवाद दिएका छन् । निर्वाचन आयोगका अनुसार मुलुकका ३३ जिल्लामा स्थानीय तहमा रिक्त विभिन्न ४१ पदका लागि आज भएको निर्वाचनमा करिब ६२ प्रतिशत मत खसेको छ ।

उपनिर्वाचनमा नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ पदका लागि आज मतदान भएको हो । बिहान ७ बजेदेखि अपराह्न ५ बजेसम्म मतदान भएको थियो । उपनिर्वाचनमा २० राजनीतिक दल र स्वतन्त्र गरी तीन सय ७६ उम्मेदवार चुनावी मैदानमा रहेका निर्वाचन आयोगले जनाएको छ ।