काठमाडौँ : कानुनमन्त्री दिलेन्द्रप्रसाद बडुले प्रधानन्यायाधीश चोलेन्द्र शमशेर राणा जबराविरुद्ध दर्ता भएको महाअभियोग प्रस्ताव दुई तिहाई बहुमतले पारित हुने विश्वास व्यक्त गरेका छन् । उनले न्यायालय सुधारका बाधक प्रधानन्यायाधीश राणाको विषय सार्वजनिक चाँसो र चिन्ताको विषय भएको भन्दै दुई तिहाई बहुमतले प्र्रस्ताव पारित हुने विश्वास व्यक्त गरेका हुन् ।

‘जो अप्रत्याशित अवरोध ‘लिगल डेडलक’ थियो । त्यो फुटाउनुपर्छ र जनतालाई छिटोभन्दा छिटो सेवा दिनुपर्छ भन्नेमा सबैको सहमति थियो,’ उनले पत्रकारसँग भने, ‘मलाई लाग्छ, दुई तिहाईले पनि यसले समर्थन पाउँछ । यो यति सार्वजनिक चाँसोको विषय हो । सार्वजनिक महत्व विषय हो । अब संवैधानिक निकासमा सबैको सहयोग पाइन्छ ।’

---

उनले न्यायालय सुधारका लागि सबैले आग्रह गरिरहेको, विज्ञले सुझाव दिएको प्रक्रियाअनुसार नै प्रधानन्यायाधीश राणामाथि महाअभियोग दर्ता भएको पनि बताए । संवैधानिक प्रक्रियाअनुसार राणामाथि लागेको महाअभियोग प्रस्ताव पारित हुने उनको विश्वास छ ।