कर्णाली स्वास्थ्य विज्ञान प्रतिष्ठानका डाक्टरद्वारा आन्दोलन फिर्ता

सुर्खेत- कर्णाली स्वास्थ्य विज्ञान प्रतिष्ठानका डाक्टर तथा स्वास्थ्यकर्मीहरूले आन्दोलन फिर्ता लिएका छन् । डाक्टर र कर्मचारी बीचको झगडाका कारण डाक्टरहरू आन्दोलनरत थिए ।

प्रतिष्ठानमा कार्यरत डा. करण साहलाई लगाइएको मुद्दा फिर्ता लिन तयार भएपछि डाक्टरहरूले आन्दोलन फिर्ता लिएका हुन् । प्रतिष्ठानका रजिष्टार नृपेन्द्रबहादुर महतले बुधबार र बिहीबार भएको सर्वदलीय छलफलमा सहमति भएपछि आन्दोलन फिर्ता लिएर आजदेखि नियमित सेवा प्रवाह गर्न तयार भएको बताए । ‘प्रतिष्ठानमा कार्यरत डाक्टर करण साह र प्रतिष्ठानमै कार्यरत ओपिडी सहायक धनबहादुर शाही बीचको झगडाका कारण भदौ २ गतेदेखि यहाँका डाक्टर तथा स्वास्थ्यकर्मीहरू आन्दोलित थिए’ उनले भने, ‘जसका कारण दुई दिनअघिदेखि आकस्मिक बाहेकका सबै सेवा ठप्प थिए ।’

---

डा. करण साहलाई लगाइएको बाल हिंसाको मुद्दा पीडक धनबहादुर शाहीकी पत्नी आशा हमाल शाहीले फिर्ता लिन निवेदन दिइन् । श्रीमानलाई मुद्दा लगाइएकाले आवेशमा आएर अर्को मुद्दा दिएको स्वीकार गरिन् । त्यसलगत्तै सर्वपक्षीय सहमति भएर प्रतिष्ठानले शुक्रबारदेखि नियमित सबै सेवा दिने भएको छ ।

भदौ २ गते ओपिडी असिस्टेन्ट शाही आफ्ना ६ वर्षीय छोराको विद्यालय ड्रेसमा उपचार गराउन ९ बजे प्रतिष्ठानमा पुगेका थिए । उनको छोराको टाउकोमा चोट लागेर टाँका लगाइएको थियो । त्यो टाँका खोल्नु थियो । टाँका खोलेर बालकलाई विद्यालय पठाउने तयारी थियो । ओपिडी नखुलिसकेकाले उनले छोरालाई सिधैँ आकस्मिक कक्षमा उपचारका लागि लिएका थिए । उनले त्यहाँ भएका डाक्टर साहसँग छोराको सामान्य पेट दुखेको र टाउकोमा टाँका लगाइएकाले त्यसलाई काट्न आग्रह गरे ।

डाक्टरले उनलाई यस्तो सानोतिनो कुराका लागि इमर्जेन्सी वार्डमा उपचार नगरिने र ओपिडी खुलेपछि उपचार गर्न जान सुझाव दिए । धनबहादुरले बारम्बार आग्रह गर्दा पनि उपचार गर्न नमानेपछि डाक्टरमाथि नै हातपात गर्न पुगेका थिए । डाक्टर र कर्मचारी बीचको उक्त लफडा अहिले प्रतिष्ठानकै समस्याका रूपमा झाँगिदै गयो ।

जुम्ला जिल्ला अदालतले प्रतिष्ठानमा कार्यरत डा. साहलाई पक्राउ पुर्जी जारी गरेपछि त्यसको विरूद्धमा संस्थाका सबै चिकित्सक तथा स्वास्थ्यकर्मीले आकस्मिक बाहेकका स्वास्थ्य सेवा बन्द गरेका थिए । आइतबार डा. साहमाथि बाल हिंसा गरेको जाहेरी जिल्ला प्रहरी कार्यालय जुम्लामा दर्ता भएको थियो । प्रहरीले जाहेरीका आधारमा चलाएको प्रक्रियाअनुसार अदालतले उनलाई सोमबार पक्राउ गर्न पुर्जी जारी गरेको थियो ।

डाक्टरमाथि आवेगमा आएर हात हालेका धनबहादुर शाहीलाई पनि बिहीबार जुम्ला अदालतले ३ लाख रुपैयाँ धरौटीमा रिहा गरेको छ । प्रतिष्ठानले छानबिन समिति गठन गरी हातपात गरेका कर्मचारी शाहीलाई ४५ दिनका लागि निलम्बन गरेको छ ।

यता प्रतिष्ठानका उपकुलपति डा.मंगल रावलका अनुसार डाक्टरमाथि लगाइएको बाल हिंसाको मुद्दा फिर्ता लिनका लागि सहमति भएपछि आन्दोलनरत डाक्टर तथा स्वास्थ्यकर्मीहरू आजदेखि नियमित काममा फर्किएको जानकारी दिए ।