कर्मचारी समायोजनको प्रक्रिया चित्तबुझ्दो छैन : स्वास्थ्यमन्त्री

काठमाडौँ- स्वास्थ्य तथा जनसंख्या मन्त्री भवानीप्रसाद खापुङले कर्मचारी समायोजनको प्रक्रिया चित्तबुझ्दो नभएको बताएका छन् ।

मंगलबार काठमाडौँमा भएको नेपाल चिकित्सक संघको दोस्रो राष्ट्रिय शिखर स्वास्थ्य सम्मेलनमा बोल्दै उनले यस्तो बताएका हुन् । मन्त्री खापुङले अहिले चिकित्सा क्षेत्रमा भइरहेको स्वास्थ्यकर्मीहरूको परिचालन र उनीहरूलाई दिएको जिम्मेवारी बाँडफाँटमा धेरै असन्तुष्टि आइरहेको जिकिर गरे । उनले देश संघयीताको अभ्यासका क्रममा रहेको भन्दै कर्मचारी क्षेत्रको समायोजन प्रक्रियामा अधिकांश कर्मचारीहरूले असन्तुष्टि व्यक्त गरिरहेको भन्ने आफ्नो बुझाइ रहेको बताए ।

---

मन्त्री खापुङले संघीयतालाई सहज बाटोमा लैजान सबैलाई चित्तबुझ्दो र सबैलाई सम्मान हुने बाटो खोज्नुपर्ने उल्लेख गरे । उनले तीनै तहको सरकार आफ्नो आफ्नो ठाउँमा जिम्मेवार र अधिकार सम्पन्न भएकोले संघीयतालाई व्यवस्थित गर्न लाग्नुपर्ने बताए ।

मन्त्री खापुङले हरेक तह र तप्कामा रहेर काम गर्ने मानिसहरू आफ्नो कार्य क्षेत्रमा विज्ञ हुने उल्लेख गरे ।