विद्यालय बन्द गरौँ : डा. शेरबहादुर पुन

काठमाडौँ : सरुवा रोग विशेषज्ञ डा. शेरबहादुर पुनले कोभिडको नयाँ प्रजाति तीन गुणाबढी गतिमा फैलिन सक्ने भएकोले लापर्बाही नगर्न सुझाव दिएका छन् । 
शनिबार काठमाडौँमा आयोजित कार्यक्रममा बोल्दै डा. पुनले भने, ‘यूके भेरियन्ट प्रजातिको यो भाइरस पहिलेभन्दा तीब्र गति फैलिन्छ । हामीले यसअघिको कमजोरीबाट पाठ सिक्नुपर्छ ।’ 

भारत र तराईबाट काठमाडौँ पसेका व्यक्तिहरू खुला रुपमा हिँडडुल गर्नु खतराको घण्टी भएको बताउँदै उनले सकेसम्म भिडभाडमा नजान आग्रह गरे । उनले कोभिडको नयाँ प्रजातिले बालबालिका बढी जोखिममा रहेको बताए ।

---

‘अहिले देशभर भौतिक रुपमा शैक्षिक संस्था सञ्चालन भइरहेका छन्,’ उनले भने, ‘शैक्षिक संस्था कोभिड फैलिने माध्यम बन्न सक्छ । त्यसैले केही दिनका लागि विद्यालय बन्द गर्नुपर्छ ।’