पोखरामा दुई जना काेभिड संक्रमितको मृत्यु

 पोखरा : गण्डकी प्रदेशमा थप दुई जना कोभिड संक्रमितको मृत्यु भएको छ । स्वास्थ्य निर्देशनालय, गण्डकीले जारी गरेको विज्ञप्ति अनुसार कास्कीका २ संक्रमितको मृत्यु भएको हो । कास्की पोखरा महानगरपालिका १४ का ४३ वर्षीय कोरोना संक्रमित पुरुषको बुधबार बेलुका साढे ७ बजे मेडिप्लस अस्पतालमा मृत्यु भएको हो ।

७ वैशाखमा कोभिड संक्रमण पुष्टि भएका उनमा श्वासप्रश्वासको समस्या थियो । पोखरा महानगरपालिका ७ का ८९ वर्षीय कोभिड संक्रमित महिलाको आज बिहान होम आइसोलेसनमा मृत्यु भएको हो । महिलामा ८ गते कोभिड संक्रमण पुष्टि भएको थियो । गण्डकीमा कोभिड संक्रमितको संख्या २२१ पुगेको छ ।

---