सुदूरपश्चिममा आज थप १०५७ जनामा कोभिड पुष्टि, २१ जनाको मृत्यु

धनगढी : सुदूरपश्चिम प्रदेशमा थप एक हजार ५७ जनामा कोभिड संक्रमण पुष्टि भएको छ । प्रदेश स्वास्थ्य निर्देशनालयका अनुसार, दुई हजार एक सय ९६ जनाको कोरोना परीक्षण गर्दा एक हजार ५७ जनामा संक्रमण पुष्टि भएको हो । पीसीआर विधिबाट नौ सय ४४ र एन्टिजेन विधिबाट एक सय १३ जनामा संक्रमण पुष्टि भएको प्रदेश स्वास्थ्य निर्देशनालयले जनाएको छ ।

योसँगै सुदूरपश्चिममा संक्रमितको संख्या ३० हजार चार सय २० पुगेको छ । संक्रिय संक्रमितको संख्या नौ हजार नाघेको छ भने तीन सय जनाको मात्रै अस्पतालमा उपचार भइरहेको छ । निर्देशनालयका अनुसार, पछिल्लो २४ घण्टामा थप २१ जना संक्रमितको मृत्यु भएको छ । कैलालीका नौ, कञ्चनपुरका ५ जना, डडेल्धुरा र बझाङ २/२ जना, बैतडी, अछाम र दार्चुलाका १/१ जनाको मृत्यु भएको हो । योसँगै प्रदेशभर कोरोना संक्रमणबाट मृत्यु हुनेको संख्या तीन सय ५४ पुगेको छ । 

---