वीर अस्पताल छेउका कानुनविपरीत सञ्चालित दुई वटा फार्मेसी बन्द

काठमाडौँ- स्वास्थ्य तथा जनसंख्यामन्त्री मोहनबहादुर बस्नेतको निर्देशनमा औषधि व्यवस्था विभागका अधिकारीहरूको समेत निरीक्षणपछि कानुनविपरीत महँगोमा औषधि बिक्रीवितरण गरिरहेका वीर अस्पताल छेउकै दुई वटा फार्मेसी बन्द गराएको छ ।

वीर अस्पतालको नयाँ भवन (सर्जिकल) को छेउमै गुठीको जग्गामा निजी स्तरमा सञ्चालन गरिएका उपकार फर्मा र सत्यम फर्माले दर्ता नभएका, म्याद गुज्रिएका र मूल्य नै नतोकिएका औषधि महँगोमा बिरामीलाई बिक्रीवितरण गरिरहेको फेला परेपछि दुईवटै फार्मेसी बन्द गरिएको हो । बिरामीलाई आवश्यक पर्ने औषधि वीर अस्पतालभित्रका फार्मेसीमा नपाउने र वीरका निर्देशकले मिलेमतोमा बिरामीलाई बाहिरका फार्मेसीबाट महँगो औषधि किनाउने गरेको गुनासो आएपछि मन्त्री बस्नेतले औषधि व्यवस्था विभागका विज्ञहरू र मन्त्रालयका अधिकारी लिएर बिहीबार आकस्मिक रूपमा वीरले सञ्चालन गरेका अस्पतालभित्र रहेका फार्मेसी र अस्पताल बाहिर निजी स्तरमा सञ्चालनमा रहेका फार्मेसीहरूको अनुगमन गरेका थिए ।

---

स्वास्थ्य मन्त्रालयका अतिरिक्त सचिव डा. विकाश देवकोटा, डा. दीपेन्द्ररमण सिंह र नीति तथा योजना डा.कृष्ण पौडेल र औषधि व्यवस्था विभागका महानिर्देशक नारायण ढकालको नेतृत्वमा सिनियर फर्मासिस्टहरू, मन्त्रालयका अधिकारी र सञ्चारकर्मीसहितको विज्ञ टोली वीर अस्पताल पुगेको थियो ।

अनुगमनमा मन्त्री बस्नेत आफू नै सहभागी भएका थिए । वीरलगायत अधिकांश सरकारी अस्पतालहरूले आफूले सञ्चालन गरेका फार्मेसीहरूमा बिरामीलाई चाहिने औषधि उपलब्ध नगराएर बाहिरका निजी फार्मेसीहरूसँगको कमिसनको मिलेमतोमा महँगोमा औषधि किनाउने गरेको गुनासो आए पनि आकस्मिक निरीक्षण गर्नु परेको मन्त्री बस्नेतले बताए ।

मन्त्री बस्नेतले भने, ‘वीर लगायतका सरकारी अस्पतालहरूका फार्मेसीमा बिरामीलाई आवश्यक पर्ने औषधि नराख्नुको कारण पत्ता लगाएर समाधान खोज्न अनुगमन गरिएको हो । जनतालाई अस्पतालकै फार्मेसीबाट न्यूनतम मूल्यमा सहज रूपमा औषधि उपलब्ध गराउनु पर्छ । कसैको मिलेमतो र कमिसनको चक्करमा बिरामीले महँगोमा औषधि किन्नु पर्ने बाध्यता हटाउनु पर्छ । ’

अनुगमनको रिपोर्ट आएपछि वीरलगायत देशभरिकै सरकारी अस्पतालहरूमा सहज रूपमा अस्पतालकै फार्मेसीबाट औषधि उपलब्ध गराइने व्यवस्था  गर्ने मन्त्री बस्नेतले बताए । अनुगमनका क्रममा वीर अस्पतालभित्र सञ्चालनमा रहेका तीन वटै फार्मेसीमा आवश्यक औषधि फेला नपरेको अतिरिक्त सचिव डा. विकाश देवकोटाले बताए । भित्रै उपलब्ध हुने औषधिको लागि समेत बाहिरबाट किनेर ल्याउनु पर्ने बाध्यता रहेको बिरामीहरूले गुनासो गरेका छन् । अस्पताल बाहिरका दुई वटा फार्मेसी निरीक्षण गर्दा भद्रगोल अवस्था देखेको औषधि व्यवस्था विभागका महानिर्देशक नारायण ढकालले बताए ।

सत्यम र उपकार फर्माले औषधि व्यवस्था विभागमा दर्ता नै नभएका औषधि बिक्रीवितरण गरिरहेको, म्याद गुज्रेका औषधि बिक्रीवितरण गरिरहेको र औषधिको भण्डारण पनि सही ढंगले नगरेको पाइएपछि दुई फार्मेसी बन्द गर्ने निर्णय गरेको महानिर्देशक ढकालले जानकारी दिए । अन्य फार्मेसीहरूको पनि निरन्तर अनुगमन गरेर निर्णय लिइने ढकालले बताए ।