प्रधानमन्त्री देउवालाई ‘वीपी कोइराला स्वास्थ्य विज्ञान प्रतिष्ठान शुद्धिकरण’ अभियानको ४८ घण्टे अल्टिमेटम

काठमाडौँ : ‘वी.पी कोइराला स्वास्थ्य विज्ञान प्रतिष्ठान शुद्धिकरण’ अभियान अन्तर्गत  आन्दोलनरत प्रतिष्ठानका चिकित्सक विद्यार्थीलगायत कर्मचारीले आफ्‍ना मागहरू ४८ घण्टाभित्र पुरा नभए आकस्मिक सेवा बन्द गर्ने चेतावनी दिएका छन् । संयुक्त संघर्ष समितिले बुधबार नवनियुक्‍त प्रधानमन्त्री शेरबहादुर देउवालाई बधाइ दिँदै ४८ घण्टाभित्र माग पुरा नभए साउन १ गते शुक्रबारदेखि हरेक दिन २ घण्टा प्रतिष्ठानको आकस्मिक सेवा, कोभिड उपचार जस्ता सेवा रोक्ने चेतावनी दिएको हो  । 

'यदि यस कदमलाई नजरअन्दाज गरिए निकट भविष्यमै आकस्मिक सेवा बाहेक अन्य सेवालाई पूर्णरूपले ठप्प गरिनेछ,' बुधबार जारी विज्ञप्तिमा भनिएको छ, 'यसबाट उत्पन्न परिस्थितिको जिम्मेवारी स्वयं कुलपति तथा प्रधानमन्त्री हुनेछन् ।' 

---

आन्दोलनरत प्रदर्शनकारीहरूले प्रतिष्ठानका पदाधिकारीले तत्काल राजीनामा दिनुपर्ने,  प्रधानमन्त्री तहबाटै वार्ता गठन कमिटी गठन गर्नुपर्ने  माग राख्दै  नवनियुक्त प्रधानमन्त्री देउवालाई कुलपतिको हैसियतले हस्तक्षेपकारी भुमिका खेल्न समेत आग्रह गरेका छन् । 

विगत ३० दिनदेखि प्रतिष्ठानमा भष्ट्राचार भएको तथा पधादीकारीले आफ्नो भूमिका निर्वाह नगरेको, शिक्षा र स्वास्थ्यमा चरम दलीय स्वार्थ अभिप्रेरित भएको भन्दै आन्दोलन भइरहेको छ ।