असोज मसान्तसम्म एक तिहाइ नागरिकले कोभिडविरुद्धको खोप पाउनेः राज्यमन्त्री श्रेष्ठ

काठमाडौँ- असोज मसान्तसम्ममा एक तिहाइ नागरिकलाई कोभिडविरुद्धको खोप लगाइने स्वास्थ्य तथा जनसंख्या राजयमन्त्री उमेश श्रेष्ठले बताएका छन् । सोमबार मन्त्रालयमा १०० दिनेको कार्ययोजना सार्वजनिक गर्दै राज्यमन्त्री श्रेष्ठले सम्पूर्ण नागरिकलाई चैत मसान्तसम्म खोप लगाइसक्ने बताएका हुन् ।

'नेपाली जनताको जीवन रक्षा गर्नु मेरो सर्वोच्च प्राथमिकता हुनेछ,' उनले भने,' खोप खरिद र उचित व्यवस्थापन गरी तथा वितरण प्रणालीमा अविलम्ब आवश्यक सुधार गरी सययसीमा भित्र सबैलाई खोप उपलब्ध गराउनेछु ।'

---

पहिलो चरणमा कोभिशील्ड खोप लगाएका १३ लाख ४८ हजार नागरिकलाई जापान सरकारको अनुदानमा प्राप्त हुने अष्ट्राजेनेका खोप प्राप्त हुनासाथ तीन दिनभित्रमा वितरण गरिने श्रेष्ठले दाबी गरे । दोस्रो मात्रा खोपको प्रतिक्षामा रहेका जेष्ठ नागरिकलाई अविलम्‍ब खोपको व्यवस्था गर्ने प्रतिबद्धता उनले व्यक्त गरे ।