काठमाडौँ - प्रदेश-१ को धरानस्थित वीपी कोइराला स्वास्थ्य विज्ञान प्रतिष्ठानले आम्दानीभन्दा बढी खर्च गरेको पाइएको छ । आ.ब २०७६/०७७ मा २९ करोड ४२ लाख रुपैयाँ खर्च गरेको छ । कुल खर्चको १२ दशमलब १३ प्रतिशत रहेको छ । प्रतिष्‍ठानको आन्तरिक आम्दानीले अस्पताल प्रशासन सञ्‍चालनमा कठिन हुने भएको छ । आम्दानी वृद्धिमा र खर्चमा मितव्ययिता नअपनाएमा प्रतिष्ठान नोक्सानमा जाने महालेखा परीक्षणको ५८ औं प्रतिवेदनले जनाएको छ ।

प्रतिवेदनका अनुसार प्रतिष्ठानले ४८ करोड ५५ लाख बढी खर्च गरेको छ । तलब भत्तामा आर्थिक वर्ष २०७४/७५ मा ६८ दशमलब २३ प्रतिशत, ०७५/०७६ मा ६२ दशमलव ०८ प्रतिशत, ०७६/०७७ मा ७४ दशमलव ५८ प्रतिशत रकम खर्च गरेको छ ।

---

सम्झौताबमोजिम २४ व्यक्तिसँग र घरजग्गाको भाडा एक करोड ६ लाख रुपैयाँ नउठाएको पाइएको छ । यस आर्थिक वर्षमा ६५ लाख रुपैयाँ मात्र प्राप्त गरेको छ ।

प्रतिवेदनमा उल्लेख गरिएअनुसार प्रतिष्‍ठानले एक करोड ७१ लाख रुपैयाँ भाडा प्राप्त गर्नुपर्नेछ । प्रतिष्ठानको नियमावली, २०५५ को नियम १७.६ मा प्रतिष्ठानको स्वामित्त्वमा वा अधिनमा रहेको घर वा जग्गा भाडामा दिँदा प्रतिष्ठानले आफ्नो प्रयोजनका लागि भाडामा लिँदा समितिबाट तोकिएबमोजिम हुने व्यवस्था छ ।

प्रतिष्ठानको आन्तरिक स्रोत, केन्द्र  र प्रदेश सरकारको अनुदानबाट २ अर्ब ७१ करोड ३८ लाख प्राप्‍त गरेको थियो । तर, प्रतिष्ठानले २ अर्ब ४२ करोड ३९ लाख खर्च गरेको छ । जसमध्ये २८ करोड ९९ लाख रुपैयाँ बचत गरेको छ ।